Վեհարանը «ազատագրելու» պողպատե մանդա՞տ․ Փաշինյանի գրառումը, Մեխակյանի լռությունն ու ՔՊ-ի ծրագիրը. ՏԵՍԱՆՅՈՒԹ

Ամենայն հայոց Գարեգին 2-րդ կաթողիկոսի քվեարկությունից ժամեր անց պարզ դարձավ, որ 14/11 ընտրատեղամասում, որտեղ իր ընտրությունն էր  կատարել կաթողիկոսը, առաջատարը «Հաղթանակ» դաշինքի առաջնորդ Սևակ Խաչատրյանն է։ Նախնական տվյալներով՝ նա ստացել է 314, ՔՊ-ի թեկնածու Արգիշտի Մեխակյանը՝ 301 քվե։

Նախնական արդյունքների հրապարակումից հետո այսօր առավոտյան Նիկոլ Փաշինյանը գրառմամբ շնորհավորեց Մեխակյանին և հայտարարեց, թե վաղարշապատցին ՔՊ-ին քվե տալով աջակցել է Գարեգին Բ-ին հեռացնելու գործընթացին։

Վաղարշապատի ընտրություններում հաղթանակը կաթողիկոսին հեռացնելու նախաձեռնության հետ կապելը հարցեր է առաջացնում։ Նախ՝ ՔՊ-ի ներկայացրած հինգ էջանոց նախընտրական ծրագրում որևէ խոսք չկա այն մասին, որ հաղթանակի դեպքում նոր թափ են հաղորդելու կաթողիկոսի հրաժարականի պահանջին։ Ուստի, անհասկանալի է Փաշինյանի պնդումը, թե վաղարշապատցին իր ընտրությամբ նոր լիքց է հաղորդել, իր ձևակերպմամբ, Վեհարանն ազատագրելու նախաձեռնությանը։

Փաշինյանի այս պնդման ֆոնին ուշագրավ են դառնում նաև ՔՊ-ի համայնքապետի թեկնածու Արգիշտի Մեխակյանի՝ Գարեգին Բ-ին հեռացնելու գործընթացից իրեն անթաքույց զերծ պահելու դիրքավորումը։

Իսկ արդեն ընտրությունների նախնական արդյունքների պարզ դառնալուց հետո Արգիշտի Մեխակյանը Factor TV-ի հարցին ի պատասխան՝ վերահաստատեց իր մոտեցումը․ «Ես իմ օրակարգում, մեր Վաղարշապատի ՏԻՄ ընտրությունների օրակարգում չենք ունեցել նման հարց, այժմ էլ չունենք»։

Այժմ, երբ արձանագրել ենք, որ ո՛չ նախընտրական ծրագրում է եղել Գարեգին Բ-ին առնչվող կետ, ո՛չ ՔՊ ցուցակը ղեկավարած Մեխակյանի օրակարգում, հարց է ծագում՝ ինչո՞ւ է Փաշինյանը ընտրություններում ՔՊ-ի հաղթանակից ժամեր անց վաղարշապատցիների տված քվեն այլ շարժառիթներով ներկայացնում։

ՔՊ վարչության անդամ Ալխաս Ղազարյանը, չհերքելով, որ նախընտրական ծրագրում Գարեգին Բ-ին առնչվող կետեր չեն ունեցել, շեշտում է, որ վաղարշապատցին նաև Փաշինյանի այս գաղափարը հաշվի առնելով է իրենց քվե տվել։

Դաշնակցական Արթուր Խաչատրյանը, որի ուժն ընտրություններին մասնակցում էր «Հաղթանակ» դաշինքի կազմում, Փաշինյանի պնդումը մոլորեցնող է համարում։ Ըստ ընդդիմադիր պատգամավորի՝ վաղարշապատցին քվեն ՔՊ-ին  չի տվել հակաեկեղեցական արշավի համար։

Փաշինյանի այս գրառումից հետո հետաքրքրական է, թե ինչ զարգացում կունենա ավելի քան կես տարի ձգվող անթաքույց կոնֆլիկտը քաղաքական իշխանության և բարձրաստիճան հոգևորականության միջև։  Վարչապետը սեպտեմբերին հայտարարել էր հոկտեմբերի ընթացքում Էջմիածնի հրապարակում հոգևոր հավաք անցկացնելու մտադրության մասին։ Այն, սակայն, տեղի չունեցավ։ Այժմ հարց է առաջանում՝ արդյո՞ք ՏԻՄ ընտրություններում սեփական թիմի հաղթանակից հետո վարչապետը կիրագործի իր մտադրությունը։

Մանրամասները՝ տեսանյութում։

Նարեկ Կիրակոսյան