11.08.2026 | 15:57
Քաբաբի պատմության մեջ աներն ու փեսան իրար հետ խոսել են, աները հումոր էր արել, բռնել են․ Կարապետյան. ՏԵՍԱՆՅՈՒԹ
Տավուշում հայտնաբերվել է ապօրինի ծառահատման 327 դեպք, որից 102 դեպքի առթիվ հարուցվել է քրգործ
Հասարակություն
27.10.2018 | 19:55
2018թ. առաջին 9 ամիսների ընթացքում Տավուշի մարզային իրավապահ մարմինների աշխատակիցների կողմից ձեռնարկված միջոցառումների արդյունքում հայտնաբերվել են ապօրինի ծառահատման 327 դեպք: 73 դեպքով պարզվել է, որ ծառահատումները կամ բնափայտի մթերումն իրականացվել է համապատասխան թույլտվությամբ: Իսկ 102 դեպքերի առթիվ հարուցվել են քրեական գործեր, որոնցով հաշվարկվել է բնությանը հասցված 195.238.922 ՀՀ դրամի վնաս:
Համեմատության համար նշենք, որ 2017թ. առաջին ինը ամիսներին հայտնաբերվել է ապօրինի ծառահատման 94 դեպք, որոնցից 25-ով հարուցվել է քրեական գործ: Դրանցով պատճառված վնասի ընդհանուր չափը կազմել է 34.086.560 ՀՀ դրամ:
Իսկ 2018թ. առաջին 9 ամիսների ընթացքում արձանագրված ապօրինի ծառահատման դեպքերով նախապատրաստված նյութերով պետությանը պատճառված վնասի չափը կազմել է 12.872.346 ՀՀ դրամ՝ 2017թ. 9 ամիսների ընթացքում արձանագրված 5.123.028 ՀՀ դրամից դիմաց: Այս տարի կամովին վերականգնվել է 5.399.529 ՀՀ դրամը, այն դեպքում, երբ նախորդ տարվա նույն ժամանակահատվածում այդ ցուցանիշը կազմել է ընդամենը 1.328.656 ՀՀ դրամ: Մնացած գումարները բռնագանձելու նպատակով հայց հարուցելու իրավասությամբ օժտված պետական մարմնին առաջարկվել է ողջամիտ ժամկետներում ներկայացնել համապատասխան հայցադիմումներ:
Քննվող քրեական գործերից 10 քրեական գործ 13 անձի նկատմամբ ուղարկվել է Տավուշի մարզի ընդհանուր իրավասության դատարան:
Այդ քրեական գործերով վնասի չափը կազմել է 8.946.920 ՀՀ դրամ, որից նախաքննության փուլում վերականգնվել է 3.212.500 ՀՀ դրամը, դատաքննության փուլում` 2.582.500 ՀՀ դրամ:
2017թ. նույն ժամանակահատվածում քննվող քրեական գործերից 5-ը՝ 5 անձի նկատմամբ, ուղարկվել Տավուշի մարզի ընդհանուր իրավասության դատարան: Այդ գործերով վնասի չափը կազմել է 1.422.750 ՀՀ դրամ: Ընդ որում՝ նախաքննության փուլում վերականգնում չի եղել, իսկ դատաքննության փուլում վերականգնվել է ընդամենը 250.000 ՀՀ դրամ:
Վերոնշյալ տվյալները փաստում են, որ ՀՀ դատախազության նախաձեռնությամբ և իրավապահ այլ մարմինների, ինչպես նաև ՀՀ գյուղատնտեսության և ՀՀ բնապահպանության նախարարությունների հետ սերտ համագործակցությամբ ապօրինի անտառահատումների կանխման, հանցավոր արարքներ կատարած անձանց ամբողջ շրջանակի ու կիրառվող հանցավոր մեխանիզմների հայտնաբերման, բնությանը հասցված վնասի իրական ծավալների հաշվարկման և վերականգնման, ոլորտը կարգավորող իրավական ակտերի հստակեցման ուղղությամբ անցած ավելի քան մեկ տարվա ընթացքում իրականացված ծավալուն աշխատանքի, ինչպես նաև ոստիկանության կողմից օպերատիվ-հետախուզական միջոցառումների արդյուննավետության բարձրացման շնորհիվ կոնկրետ Տավուշի մարզում ապօրինի անտառահատումների դեպքերի հայտնաբերման ցուցանիշն ավելացել է գրեթե 3.5, հարուցվող քրեական գործերի քանակը՝ 4 անգամ: Իսկ ապօրինի ծառահատումների դեպքերի առթիվ նախապատրաստված նյութերով և հարուցված քրեական գործերով ինչպես նախնական քննության, այնպես էլ դատական քննության ընթացքում վերականգնված՝ պետությանը պատճառված վնասը նախորդ տարվա 9 ամիսների համեմատությամբ ավելացել է գրեթե 10 անգամ:
Արձանագրված ցուցանիշները վկայում են, որ ստեղծվել են վերոնշյալ օղակների միջև ակտիվ համագործակցությամբ և նախաձեռնողականությամբ ապօրինի անտառահատման դեմ պայքարն առավել արդյունավետ դարձնելու նախադրյալներ, միաժամանակ հարկ է նշել, որ դեռևս լուրջ անելիքներ կան հատկապես անտառային գոտիների և փայտանյութի տեղափոխման երթուղիների վերահսկողության, ինչպես նաև ապօրինի հատում իրականացնող, ինչպես նաև ոլորտում կոռուպցիոն համագործակցության մեջ ներգրավվող անձանց շրջանակները լիարժեք բացահայտելու ուղղությամբ:
Այդ գործում ակնկալվում է նաև բնակչության, հանրային շահագրգիռ, ակտիվ հատվածների նախաձեռնողականությունն ու արդյունավետ համագործակցությունը:
