29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Ինչ է նվիրել Սերդար Քըլըչը Արարատ Միրզոյանին
Քաղաքականություն
22.09.2025 | 19:02
Հայաստան-Թուրքիա կարգավորման գործընթացում Թուրքիայի հատուկ ներկայացուցիչ Սերդար Քըլըչը Երևան այցի ժամանակ զարդանախշերով ապակե թաս է նվիրել ՀՀ արտաքին գործերի նախարար Արարատ Միրզոյանին։ Այս մասին Factor.am-ը տեղեկանում է Միրզոյանի՝ Կոռուպցիայի կանխարգելման հանձնաժողով ներկայացրած նվերների հաշվառման ձևաթղթից։ Նվերի արժեքը գնահատվել է 73 473 դրամ։
ԱԳ նախարարը նվերը ստացել է օգոստոսի 12-ին՝ Երևանում Թուրքիայի հատուկ ներկայացուցչին ընդունելու օրը։
Հիշեցնենք, որ Սերդար Քըլըչն օգոստոսի 12-ին Հայաստան էր ժամանել հայ-թուրքական սահմանի Մարգարայի անցակետով, որտեղ նրան դիմավորել էր Հայաստանի բանագնաց Ռուբեն Ռուբինյանը:
Նա ՀՀ ԱԳՆ շենքում նախ հանդիպել էր Ռուբինյանին, ապա՝ Արարատ Միրզոյանին։
Հավելենք, որ «Հանրային ծառայության մասին» օրենքում կատարված փոփոխություններով սահմանվել են հանրային ծառայողների կողմից նվերներ ընդունելու վերաբերյալ նոր կանոններ։ Ըստ այդ կարգավորումների՝ պետությանը կամ համայնքին են հանձնվում պետական, պաշտոնական այցերի, միջոցառումների, ինչպես նաև աշխատանքային այցերի, գործուղումների շրջանակում տրվող նվերները, եթե դրանց արժեքը գերազանցում է 60,000 ՀՀ դրամը:
Անի Թամրազյան
