«Հանրապետություն» խմբակցությունն առաջարկում է փոխել «խորհրդային անցյալը խորհրդանշող» Լենինգրադյան փողոցի անունը

Երևանի ավագանու «Հանրապետություն» խմբակցությունն առաջարկում է Երևան քաղաքի Աջափնյակ և Մալաթիա-Սեբաստիա վարչական շրջանների Լենինգրադյան փողոցն անվանափոխել բարերար Քըրք Քըրքորյանի անվամբ։ 

Լենինգրադյան փողոցն անունը ստացել է խորհրդային շրջանում՝ ի պատիվ Լենինգրադ քաղաքի (այժմ՝ Սանկտ Պետերբուրգ)։ «Ակտիվ քաղաքացի» հարթակում քվեարկության դրված նախագծի hիմնավորման մեջ նշվում է, որ Լենինգրադյան փողոցը մինչ օրս կրում է խորհրդային անցյալը խորհրդանշող անվանում։ 

«Անգամ Ռուսաստանի Դաշնությունում արդեն տարիներ շարունակ Լենինգրադ անվանումը որպես վարչատարածքային միավոր գոյություն չունի (քաղաքն արդեն վերանվանվել է Սանկտ Պետերբուրգ)»,- ասվում է հիմնավորման մեջ:

Նախագծի հեղինակները շեշտում են, որ Քըրք Քըրքորյանը երբեք անձամբ չէր մասնակցում իր անունով որևէ հաստատության բացման և միայն մեկ անգամ է այցելել Հայաստան։

Նշված է նաև, որ 1990-ականներին ստեղծված «Լինսի» բարեգործական հիմնադրամի միջոցով 2001-2011 թվականներին Հայաստանը ստացել է շուրջ մեկ միլիարդ դոլարի աջակցության փաթեթ։

«Հիմնադրամի միջոցով իրականացվել են՝

• ՀՀ մի շարք մարզերում և Երևանում ավելի քան 450 կմ ճանապարհների կապիտալ վերակառուցում,
• ավելի քան 300 դպրոցների և մանկապարտեզների հիմնանորոգում,
• հիվանդանոցների, բուժկետերի, մշակույթի տների վերանորոգում  և   վերազինում,
• սոցիալական տների կառուցում Ստեփանակերտում՝ արցախյան պատերազմի ընթացքում բնակարանազուրկ մնացածների համար,
• ՀՀ-ում բարձր տեխնոլոգիական սարքավորումների մատակարարում բժշկական և կրթական հաստատություններին»,- նշվում է «Հանրապետություն» խմբակցության հեղինակած նախագծի հիմնավորման մեջ։

Նշենք, որ նախագիծը մշակվել է խմբակցության ղեկավար Անի Խաչատրյանի և անդամներ Մհեր Բեջանյանի, Հայկ Սահակյանի, Արմեն Մկրտչյանի, Հարություն Մանվելյանի, Գոհար Բալդրյանի, Նելլի Ղարդյանի, Լինա Ղշյանի կողմից։

Այս պահին նախագծին կողմ է քվեարկել 75 քաղաքացի, դեմ՝ 3-ը։ Նախագիծը դիտվել է 362 անգամ, իսկ քվեարկությունը կավարտվի սեպտեմբերի 25-ին։ Հաջորդիվ նախագիծը կընդգրկվի ավագանու նիստի օրակարգ։

Արփի Հակոբյան