05.09.2026 | 18:31
«Հեծանվային մեծ սպորտը գալիս է Հայաստան». ներկայացվել է «Tour of Armenia»-ի խորհրդանիշը
Ալիևը կրկին, այսպես կոչված, «Զանգեզուրի միջանցք» եզրույթն է օգտագործել
Քաղաքականություն
22.09.2025 | 11:29
Ադրբեջանի շահավետ աշխարհագրական դիրքը երկիրը դարձնում է տարածաշրջանային տնտեսական քաղաքականության ռազմավարական կենտրոն։ Այս մասին հայտարարել է Ադրբեջանի նախագահ Իլհամ Ալիևը Բաքվում ընթացող առաջին միջազգային ներդրումային ֆորումի մասնակիցներին ուղղված ուղերձում՝ կրկին օգտագործելով, այսպես կոչված, «Զանգեզուրի միջանցք» եզրույթը։
«Միջին միջանցքով տարանցիկ բեռնափոխադրումների ծավալները տարեցտարի աճում են։ Այս ցուցանիշը, ի դեպ, առաջիկա տարիներին ավելի կաճի, հատկապես, Զանգեզուրի միջանցքը շահագործման հանձնելու հետ մեկտեղ»,- ասել է Ալիևը։
Նա նշել է, թե Ադրբեջանն իր արտաքին քաղաքականության մեջ այժմ առաջնահերթություն է տալիս տնտեսական դիվանագիտությանը։
«Մեր երկրի տարածքային ամբողջականությունն ապահովելուց հետո Ադրբեջանի ջանքերով հիմք է դրվել տարածաշրջանում երկարաժամկետ խաղաղության, կայունության և կայուն զարգացման համար։ Ներկայում Ադրբեջանն իր արտաքին քաղաքականության մեջ առաջնահերթություն է տալիս տնտեսական դիվանագիտությանը՝ ուղղված նոր համագործակցության հաստատման և երկրի ոչ նավթային ոլորտների, մասնավորապես, զբոսաշրջային ներուժի հետագա ամրապնդման վրա»,-ասվում է Ալիևի ուղերձում։
Նշենք, որ Վաշինգտոնում օգոստոսի 8-ին ստորագրված համաձայնագրերով որևէ «Զանգեզուրի միջանցքի» մասին խոսք չկա։ Դրանցում նշվում է «Թրամփի երթուղու» (TRIPP) մասին, սակայն Բաքվի քարոզչամեքենան ու ադրբեջանցի պաշտոնյաները շարունակում են միջանցք եզրույթն օգտագործել՝ խեղաթյուրելով ստորագրված փաստաթղթերի բովանդակությունը։ Ալիևը վաշինգոնյան փաստաթղթերի ստորագրումից հետո արդեն մի քանի անգամ տարբեր առիթներով օգտագործել է «Զանգեզուրի միջանցք» եզրույթը։
Թարգմանությունը՝ Էմմա Չոբանյանի
