Ալիևը շարունակում է «Զանգեզուրի միջանցք» եզրույթը կիրառել

«Մեր երկրի ինքնիշխանության և տարածքային ամբողջականության վերականգնումից հետո տարածաշրջանում մեր կողմից առաջ մղվող խաղաղության օրակարգը նոր հորիզոններ է բացում մեր արտաքին քաղաքականության համար և կարևոր դեր է խաղում դրան ավելի գլոբալ բնույթ հաղորդելու գործում»։

Ադրբեջանական լրատվամիջոցների հաղորդմամբ՝ այս մասին ասվում է Ադրբեջանի նախագահ Իլհամ Ալիևի՝ Ասիայում փոխգործակցության և վստահության ամրապնդման միջոցառումների համաժողովի վերլուծական կենտրոնների ֆորումի 13-րդ հանդիպման մասնակիցներին ուղղված ուղերձում։

Նա նշել է, որ  անցյալ ամիս Ադրբեջանի և Հայաստանի միջև խաղաղության համաձայնագրի նախաստորագրումը բարենպաստ հնարավորություններ է ստեղծում ինչպես տարածաշրջանի, այնպես էլ ավելի լայն աշխարհագրության համար։

Վաշինգտոնում  օգոստոսի 8-ին Հայաստանի ու Ադրբեջանի միջև փաստաթղթերի ստորագրումից հետո, Ալիևը շարունակում է, այսպես կոչված, «Զանգեզուրի միջանցք» եզրույթն օգտագործել։

«Գտնվելով Արևելք-Արևմուտք և Հյուսիս-Հարավ միջանցքներում՝ Ադրբեջանը դառնում է Եվրասիայի ամենակարևոր տրանսպորտային և լոգիստիկ կենտրոններից մեկը։ Ես նաև չեմ կասկածում, որ «Զանգեզուրի միջանցքը», որպես Միջին միջանցքի երթուղիներից մեկը, մոտ ապագայում կխաղա մայրցամաքները կապող կարևոր տրանսպորտային օղակի դեր»,-ասվում է Ադրբեջանի ղեկավարի ուղերձում։

Հավելենք, որ օրերս Ալիևը  Շանհայի համագործակցության կազմակերպության նիստում էր «Զանգեզուրի միջանցք» եզրույթը կիրառել, այնինչ Վաշինգտոնում օգոստոսի 8-ին ստորագրված համաձայնագրերոում նման եզրույթ չի կիրառվում։ Դրանցում նշվում է «Թրամփի երթուղու» (TRIPP) մասին, իսկ հայկական կողմը վստահեցնում է, որ հաղորդակցությունների ապաշրջափակումը տեղի է ունենալու ինքնիշխանության, իրավազորության, հավասարության և փոխադարձության սկզբունքների հիման վրա։

Թարգմանությունը՝ Էմմա Չոբանյանի