Քաղաքականություն
04.09.2025 | 21:25
Ուկրաինայի նախագահ Վլադիմիր Զելենսկին մեկնաբանել է Ռուսաստանի նախագահ Վլադիմիր Պուտինի երեկվա հայտարարություններն այն մասին, որ իր և Ուկրաինայի ղեկավարի հանդիպումը կարող է տեղի ունենալ Մոսկվայում, գրում է BBC-ի ռուսական ծառայությունը։
«Կարծում եմ, որ, գիտեք, ուզում ես, որ հանդիպումը չկայանա, պետք է ինձ հրավիրել Մոսկվա։ Ռուսաստանը սկսել է խոսել հանդիպման մասին՝ դա արդեն վատ չէ։ Բայց մենք դեռ չենք տեսնում նրանց ցանկությունը՝ դադարեցնել պատերազմը», – ասել է Զելենսկին Փարիզում Էմանուել Մակրոնի հետ համատեղ մամուլի ասուլիսում։
Հիշեցնենք, որ Չինաստան կատարած այցի ժամանակ Պուտինը հայտարարել էր, որ Զելենսկիի հետ հանդիպումը կարող է տեղի ունենալ Մոսկվայում` նրան հրավիրելով ՌԴ մայրաքաղաք։
Զելենսկին նաև պատմել է, թե ինչ անվտանգության երաշխիքներ է այսպես կոչված «կամավորների կոալիցիան» համաձայնել տրամադրել Կիևին Ռուսաստանի հետ պատերազմի ավարտի դեպքում։
Նրա խոսքով՝ Ուկրաինային աջակցող 26 երկրները խոսում են հետևյալ բաղադրիչների մասին.
Ուժեղ ուկրաինական բանակ, որի թվաքանակը ոչ մի կերպ չպետք է սահմանափակվի։
Ուկրաինայում զենքի արտադրության աճ, ինչպես նաև Միացյալ Նահանգներից զենքի, այդ թվում՝ հակաօդային պաշտպանության համակարգերի գնման տարբեր ծրագրեր։
Արտասահմանյան զորքերի ներկայությունը Ուկրաինայի տարածքում։
Զելենսկին հավելել է, որ այդ ներկայությունը կլինի «ծովում, օդում և ցամաքում»։
Բաղադրիչներից է նաև այսպես կոչված «backstop»-ը կամ աջակցությունը Միացյալ Նահանգներից։
Ուկրաինայի նախագահն ասել է, որ դեռ պատրաստ չէ նկարագրել Վաշինգտոնի ներգրավվածության մանրամասները՝«չնայած տարրերն արդեն պարզ են»։
Թարգմանությունը`Էմմա Չոբանյանի
