Տնտեսություն
02.09.2025 | 13:39
ՀՀ պետական եկամուտների կոմիտեն հայտնում է, որ Հայաստանը ներդրել է ՏՀԶԿ Հարկային նպատակներով ֆինանսական հաշիվների վերաբերյալ տեղեկությունների ավտոմատ փոխանակման ստանդարտը, որի շրջանակում ֆինանսական հաշիվների վերաբերյալ տեղեկությունների փոխանակումը կիրականացվի 2025 թվականի սեպտեմբերի 30-ին։
Կոմիտեն տեղեկացնում է, որ փոխանակումն ընդգրկելու է օտարերկրյա հարկային ռեզիդենտների հաշիվների վերաբերյալ տեղեկությունները: Ընդ որում, հարկման նպատակով ՀՀ ռեզիդենտ են համարվում այն ֆիզիկական անձինք, որոնք հարկային տարում գտնվել են Հայաստանում 183 օր կամ ավելի, կամ որոնց կենսական շահերի կենտրոնը գտնվում է Հայաստանում։ Կենսական շահերի կենտրոնը համարվում է այն վայրը, որտեղ կենտրոնացած են անձի ընտանեկան կամ տնտեսական շահերը։ Մասնավորապես, եթե Հայաստանում է գտնվում նրա տունը (որտեղ բնակվում է նրա ընտանիքը), անձնական կամ ընտանեկան հիմնական գույքը, կամ հիմնական տնտեսական (պրոֆեսիոնալ) գործունեության իրականացման վայրը։ Իրավաբանական անձի դեպքում հարկային ռեզիդենտության երկիր համարվում է այն երկիրը, որի իրավասու մարմնի կողմից այն գրանցված է կամ որտեղ գտնվում է դրա իրական ղեկավարման վայրը։
«Միաժամանակ, կարևոր է ընդգծել, որ այն անձինք, որոնց վերաբերյալ տեղեկությունները նախատեսվում է փոխանակել, այդ մասին պատշաճ ծանուցվում են համապատասխան ֆինանսական հաստատության կողմից: Եթե տվյալ անձինք չեն ցանկանում, որ իրենց հաշվի վերաբերյալ տեղեկությունները փոխանակվեն, ապա ֆինանսական հաստատությունը դադարեցնում է նրանց հետ գործարար հարաբերությունները կամ չի հաստատում այդպիսիք, և հարկային մարմնի կողմից այդ հաշիվների փոխանակում չի իրականացնում»,- ասված է ՊԵԿ-ի տարածած հաղորդագրությունում։
