29.04.2026 | 17:01
ՄԱԿ-ը հայտնում է, որ Իրանում պատերազմի սկզբից ի վեր մահապատժի է ենթարկվել առնվազն 21 մարդ, ձերբակալվել՝ 4000-ը
Շվեյցարիան չի ձերբակալի Պուտինին, եթե նա ժամանի Ուկրաինայի նախագահի հետ բանակցությունների
Քաղաքականություն
19.08.2025 | 17:01
Շվեյցարիան Ռուսաստանի նախագահ Վլադիմիր Պուտինին անձեռնմխելիություն կտրամադրի Հաագայի Միջազգային քրեական դատարանի կողմից իր տարածքում հետապնդումից, եթե Մոսկվան և Կիևն այդ երկիրն ընտրեն բարձր մակարդակի բանակցությունների համար: Այս մասին հայտարարել է Շվեյցարիայի արտաքին գործերի նախարար Իգնացիո Կասիսը, փոխանցում է «Ազատություն» ռադիոկայանը:
Պաշտոնյան այս հնարավորությունը բացատրել է անցյալ տարի հատուկ ստեղծված ընթացակարգով: Շվեյցարիայի կառավարությունը որոշել է չկատարել միջազգային ձերբակալման օրդերները, եթե մեղադրյալները երկիր են ժամանել խաղաղ բանակցությունների, այլ ոչ թե մասնավոր այցի համար:
Ավելի վաղ ԱՄՆ նախագահ Դոնալդ Թրամփը հայտարարել էր, որ Պուտինի և Ուկրաինայի նախագահ Վլադիմիր Զելենսկիի միջև բանակցությունների նախապատրաստական աշխատանքներ է սկսել:
Ըստ աղբյուրների՝ հանդիպումը պետք է տեղի ունենա Եվրոպայում: Ֆրանսիայի նախագահ Էմանուել Մակրոնն առաջարկել է դրա համար ընտրել Շվեյցարիան։ Reuters-ն էլ, վկայակոչելով իր աղբյուրներին, հայտնել է, որ հանդիպումը կարող է տեղի ունենալ Բուդապեշտում. Հունգարիան որոշել է դուրս գալ ՄՔԴ-ից և չի ճանաչում պետությունների ղեկավարների համար տրված դատարանի օրդերները: Որպես հանդիպման հավանական վայր՝ նշվում է նաև Հռոմը։
Միջազգային քրեական դատարանը (ՄՔԴ) Պուտինի ձերբակալության օրդեր է տվել 2023 թվականի մարտին: Նա մեղադրվում է Ուկրաինայից երեխաներին անօրինական կերպով արտաքսելու մեջ: Մոսկվան հերքում է ռազմական հանցագործություններ կատարելու մեղադրանքը և չի ճանաչում դատարանի օրինականությունը:
