12.01.2026 | 21:26
Չաբի Ալոնսոն հեռացվեց «Ռեալից»
Թրամփի և Զելենսկու հանդիպմանը հնարավոր է՝ մասնակցեն Ֆինլանդիայի նախագահն ու ՆԱՏՕ-ի գլխավոր քարտուղարը. Politico
Քաղաքականություն
17.08.2025 | 12:54
Politico պարբերականի դիվանագիտական աղբյուրները հայտնում են, որ երկուշաբթի օրը Վաշինգտոնում կայանալիք ԱՄՆ-ի և Ուկրաինայի նախագահների հանդիպմանը կարող են մասնակցել Ֆինլանդիայի առաջնորդ Ալեքսանդր Ստուբը և ՆԱՏՕ-ի գլխավոր քարտուղար Մարկ Ռյուտեն: Այս մասին փոխանցում է BBC-ի ռուսական ծառայությունը։
Աղբյուրի փոխանցմամբ՝ Ստուբը և Ռյուտեն, որոնք դասվում են Դոնալդ Թրամփի սիրելի զրուցակիցների շարքին, պետք է նպաստեն Վոլոդիմիր Զելենսկու ջերմ ընդունելությանը Սպիտակ տանը:
«Գաղափարն այն է, որ Ստուբը կարող է օգնել կանխել Թրամփի և Զելենսկու միջև բախումը և համոզել ԱՄՆ նախագահին ներառել Եվրոպան հետագա բանակցություններում»,- գրում Է Politico-ն:
Զելենսկին մեկնում է Վաշինգտոն Ալյասկայում Վլադիմիր Պուտինի հետ Թրամփի բանակցություններից հետո: Խոսելով Ռուսաստանի նախագահի հետ՝ Սպիտակ տան ղեկավարը հրաժարվել է ժամանակավոր զինադադարի հասնելու գաղափարից, փոխարենն առաջարկել է միանգամից փորձել երկարաժամկետ խաղաղության համաձայնագիր կնքել։
«Պարզ է, որ Ալյասկայի գագաթնաժողովի արդյունքը մտահոգություններ է առաջացրել Եվրոպայում, քանի որ Թրամփը, ըստ ամենայնի, ընդունել է Պուտինի փաստարկների զգալի մասը»,- Politico-ին ասել է ՆԱՏՕ-ի նախկին բարձրաստիճան պաշտոնյա Կամիլ Գրանդը, որը կապ է պահպանում եվրոպացի գործող պաշտոնյաների հետ:
«Այս հանդիպումը լիակատար աղետ չեն համարում, Բայց եվրոպացիները մտահոգված են, թե որ ուղղությամբ են զարգանում իրադարձությունները։ Ուստի նրանք փորձում են խուսափել նոր դրամայից Զելենսկու ապագա այցի ժամանակ»,- հավելել է Գրանդը։
Վաշինգտոն Ստուբի այցի վերաբերյալ Politico-ի տվյալները դեռ չեն հաստատվել այլ աղբյուրների կողմից:
Ավելի վաղ տեղեկացրել էինք, որ Զելենսկին Սպիտակ տանը կհանդիպի ԱՄՆ նախագահ Դոնալդ Թրամփի հետ։
