24.06.2026 | 05:04
ԱԱ-2026. Խորվաթիան տարավ առաջին հաղթանակը. ՏԵՍԱՆՅՈՒԹ
Զելենսկին օգոստոսի 18-ին Վաշինգտոնում կհանդիպի Թրամփի հետ
Քաղաքականություն
16.08.2025 | 12:22
Ուկրաինայի նախագահ Վլադիմիր Զելենսկին Սպիտակ տանը կհանդիպի ԱՄՆ նախագահ Դոնալդ Թրամփի հետ։ Զելենսկին այս մասին հայտարարել է Թրամփի հետ հեռախոսազրույցից հետո․ գրում է meduza.io-ն։
Հանդիպումը տեղի կունենա երկուշաբթի՝ օգոստոսի 18-ին։
Զելենսկին ասել է, որ Թրամփի հետ իր զրույցը «երկարատև և բովանդակալից» է եղել։ ԱՄՆ նախագահը նրան ներկայացրել է Ռուսաստանի նախագահ Վլադիմիր Պուտինի հետ իր հանդիպման արդյունքները։ Զրույցի ավարտին զրույցին միացել են նաև եվրոպացի առաջնորդներ։
Զելենսկին նաև նշել է, որ Կիևը կողմ է Ուկրաինայի, ԱՄՆ-ի և Ռուսաստանի առաջնորդների միջև եռակողմ հանդիպման անցկացմանը։
Axios-ի լրագրող Բարակ Ռավիդը, հղում անելով աղբյուրին, հայտնել է, որ զրույցի ընթացքում Թրամփն ասել է, որ Պուտինը չի ցանկանում ժամանակավոր հրադադար՝ նախընտրելով անմիջապես կնքել համապարփակ խաղաղության համաձայնագիր։ Ինքը՝ Թրամփը, ըստ աղբյուրի, ասել է, որ ընդհանուր առմամբ համաձայն է Պուտինի դիրքորոշման հետ։
Պուտինի հետ բանակցություններից հետո Fox News-ին տված հարցազրույցում Թրամփն ասել է, որ կողմերը «բավականին մոտ են համաձայնության»։ Նրա խոսքով՝ այժմ Ուկրաինան պետք է համաձայնի դրան, և ամեն ինչ «կախված է նախագահ Զելենսկիից»։ Թրամփը չի մանրամասնել հնարավոր համաձայնագրի պայմանները, միայն հաստատել է, որ այն նախատեսում է «տարածքների փոխանակում» և անվտանգության երաշխիքներ Ուկրաինայի համար։
Թարգմանությունը՝ Անահիտ Խաչատրյանի
