ՌԴ-ն զանգվածային հարվածներ է հասցրել Վիննիցային և Կրիվոյ Ռոգին․ կան տուժածներ

Ռուսական զորքերը հուլիսի լույս 16-ի գիշերը կրկին հարվածել են Ուկրաինային։ Վիննիցայի մարզում ռուս զինվորականները հարձակվել են երկու քաղաքացիական արդյունաբերական օբյեկտի վրա, լայնածավալ հրդեհներ են բռնկվել, գրում է Current time-ը։

Ուկրաինայի արտակարգ իրավիճակների պետական ծառայությունը հայտնել է, որ ժամը 08:00-ի դրությամբ՝ մեկ հրդեհ մարվել է, մյուս օբյեկտում աշխատանքները շարունակվում  են։ Միաժամանակ, վնասվել է չորս բնակելի տուն, վիրավորվել է ութ մարդ։

Վիննիցայի տարածաշրջանային ռազմական վարչակազմի ղեկավարի տեղակալ Նատալյա Զաբոլոտնայան հայտնել է, որ տարածաշրջանը հարձակման է ենթարկվել 28 ԱԹՍ-ով, որից 18-ը ոչնչացվել են։

Կրիվոյ Ռոգում տուժել է 17-ամյա պատանի։ Քաղաքի պաշտպանության խորհրդի նախագահ Ալեքսանդր Վիլկուլի խոսքով՝ ավերվել է արդյունաբերական ձեռնարկություն, բռնկվել են մի քանի հրդեհներ։ Քաղաքի մի քանի շրջաններ մնացել են առանց էլեկտրաէներգիայի։

«Պատերազմի սկզբից ի վեր քաղաքի վրա իրականացված ամենամասշտաբային հարձակման՝ միաժամանակ բալիստիկ հրթիռի և 28 «Շահեդի» հետևանքով եղել են և բազմաթիվ հարվածներ», – գրել է նա։

Ուկրաինայի ռազմաօդային ուժերը հայտնել են, որ Ռուսաստանը գիշերը հարձակվել է երկրի վրա «Իսկանդեր-Մ» բալիստիկ հրթիռով և 400 ԱԹՍ-ով, հարվածային անօդաչու թռչող սարքերով և իմիտատորներով։

«Հարվածի հիմնական ուղղություններն են Կրիվոյ Ռոգը, Խարկովը, Վիննիցան»,- ասվում է հայտարարության մեջ։

Նշվում է, որ խոցվել է 198 անօդաչու թռչող սարք։ Խարկովում էլ ռուսական անօդաչու թռչող սարքերի զանգվածային հարձակման հետևանքով տուժել է երեք մարդ։

Թարգմանությունը՝ Էմմա Չոբանյանի