Հռոմի պապը Զելենսկիին առաջարկել է Վատիկանում ՌԴ-ի և Ուկրաինայի միջև բանակցություններ անցկացնել․ ՏԵՍԱՆՅՈՒԹ

Ուկրաինայի նախագահ Վլադիմիր Զելենսկին հանդիպել է Հռոմի պապ Լևոն XIV-ի հետ։ Նրանք քննարկել են Ուկրաինայի և Ռուսաստանի միջև խաղաղության բանակցությունները։ Հանդիպումը տեղի է ունեցել Հռոմի մոտ գտնվող Կաստել Գանդոլֆոյի պապական նստավայրում, գրում է The Guardian-ը։

Վատիկանի տարածած հաղորդագրությունում նշվում է, որ կողմերը «քննարկել են շարունակվող հակամարտությունը և արդար ու երկարատև խաղաղության հրատապ անհրաժեշտությունը»։

«Մտերիմ զրույցի ընթացքում վերահաստատվել է երկխոսության կարևորությունը՝ որպես թշնամական գործողությունների դադարեցման նախընտրելի միջոց։ Սուրբ Հայրը ցավակցություն է հայտնել զոհերի համար և վերահաստատել իր աղոթքներն ու մտերմությունը ուկրաինացի ժողովրդի հետ՝ կոչ անելով գործադրել բոլոր ջանքերը՝ գերիներին ազատ արձակելու և համատեղ լուծումներ գտնելու համար»,- ասվում է հաղորդագրության մեջ։

Նշվում է, որ Հռոմի պապը «վերահաստատել է Ռուսաստանի և Ուկրաինայի ներկայացուցիչներին Վատիկանում բանակցությունների համար ընդունելու պատրաստակամությունը»։

Ռուսաստանը նախկինում մերժել էր այս առաջարկը, իսկ ՌԴ արտաքին գործերի նախարար Սերգեյ Լավրովը ենթադրություն էր հայտնել, որ երկու ուղղափառ քրիստոնյա երկրների համար նպատակահարմար չի լինի այնտեղ բանակցություններ վարել։

Վլադիմիր Զելենսկին էլ ասել է, որ Հռոմի պապի հետ քննարկել է Ռուսաստանի Դաշնության կողմից առևանգված ուկրաինացի երեխաների վերադարձի հարցը և Վատիկանին խաղաղ կարգավորմանը ներգրավելու հնարավորությունը։

«Շատ շնորհակալ եմ այս հանդիպման համար, այն բանի համար, որ նա ընդունեց մեզ և, իհարկե, նրա օգնության համար՝ թե՛ հոգևոր, թե՛ գործնական՝ Ռուսաստանի կողմից առևանգված մեր երեխաների վերադարձի հարցում։ Մենք ցանկանում ենք խաղաղություն և շատ հույս ունենք, որ Վատիկանը կարող է օգնել երկխոսության համար տարածք ստեղծելու հարցում, որը կհանգեցնի այս պատերազմի ավարտին»,- ասել է նա։

Հավելենք, որ Զելենսկին Հռոմ է ժամանել հուլիսի 9-ին՝ մասնակցելու Ուկրաինայի վերականգնմանը նվիրված միջազգային համաժողովին։ Զելենսկիին ընդունելու է նաև Իտալիայի նախագահ Սերջիո Մատարելան։ Բացի այդ, նախատեսվում է նրա հանդիպումը Ուկրաինայի հարցերով ԱՄՆ հատուկ բանագնաց Քիթ Քելլոգի հետ։

Թարգմանությունը՝ Էմմա Չոբանյանի