ՌԴ Անվտանգության դաշնային ծառայությունը (ԱԴԾ) հայտարարել է, որ Սարատովի մարզում կանխվել է երկաթուղային կամրջի պայթյունը։ Նշվում է, որ պայթյունը նախապատրաստող անձը «զինված դիմադրություն է ցուցաբերել և, ի վերջո, ոչնչացվել է պատասխան կրակով», գրում է Meduza-ն:

ԱԴԾ-ի տվյալներով՝ պայթյունը նախապատրաստել է Ռուսաստանի քաղաքացի, որը «կապեր է պահպանել ուկրաինական կողմի հետ և մտադիր է եղել անօրինական գործողությունը կատարելուց հետո մեկնել Ուկրաինա՝ ռազմական գործողություններին մասնակցելու համար»։ Կասկածյալը ծրագրել է կամուրջը պայթեցնել ինքնաշեն պայթուցիկ սարքով, որը պահում էր թաքստոցում։ Այս մասին ասվում է ԱԴԾ-ի հայտարարության մեջ:

Ռումբը հեռացնելու փորձի ժամանակ կասկածյալը դիմադրություն է ցույց տվել է և սպանվել։

«Դեպքի վայրում հայտնաբերվել և առգրավվել են 11 կիլոգրամ քաշով օգտագործման համար պատրաստի ինքնաշեն պայթուցիկ սարք, «Մակարով» ատրճանակ և դրա համար նախատեսված փամփուշտներ, ինչպես նաև «հետաքննության համար կարևոր իրեր»,- հայտնել է ԱԴԾ-ն։

Հարուցվել է քրեական գործ՝ «պայթուցիկ նյութերի և պայթուցիկ սարքերի անօրինական շրջանառության» և «պայթուցիկ նյութերի և պայթուցիկ սարքերի անօրինական արտադրության» հոդվածներով, որոշվում է «ահաբեկչական գործողություն» հոդվածով գործ հարուցելու հարցը։

Հավելենք, որ հունիսի լույս 1-ի գիշերը Բրյանսկի մարզի Վիգոնիչսկի շրջանում ավտոմոբիլային կամուրջ էր փլուզվել Կլիմով-Մոսկվա ուղևորատար գնացքի պայթյունի պատճառով։ 7 մարդ զոհվել էր, 113-ը՝ վիրավորվել։ Հունիսի լույս 1-ի գիշերն էլ Կուրսկի մարզի Ժելեզնոգորսկի շրջանում պայթյունից հետո ճանապարհի վրա փլուզվել էր երկաթուղային կամուրջը, որի վրայով ընթանում էր բեռնատար գնացքը։ Միջադեպի հետևանքով վիրավորվել էին մեքենավարը և նրա երկու օգնականները։

Ռուսաստանի քննչական կոմիտեն Բրյանսկի և Կուրսկի մարզերում կամուրջներ պայթեցնելու մեջ մեղադրել է «Կիևի ռեժիմի հրահանգներով գործող ահաբեկիչներին»՝ հարուցելով քրեական գործեր «ահաբեկչական գործողություն» հոդվածով։

Թարգմանությունը՝ Էմմա Չոբանյանի