Չինաստանի ԶՈւ-ն լազերով թիրախավորել է Կարմիր ծովում գերմանական ինքնաթիռը․ դեսպանը կանչվել է Գերմանիայի ԱԳՆ

Գերմանիան Չինաստանի դեսպանին կանչել է երկրի ԱԳՆ՝ այն բանից հետո, երբ Բեռլինը հայտարարել է, որ Չինաստանի զինված ուժերը լազերով թիրախավորել են Կարմիր ծովում ԵՄ գործողությանը մասնակցող գերմանական ինքնաթիռը, գրում է Reuters-ը։

Լարվածության սրումը տեղի է ունենում ԵՄ-ում մտահոգությունների աճի ֆոնին, որոնք կապված են Եվրոպայի կարևորագույն տեխնոլոգիաների և անվտանգության ենթակառուցվածքների վրա Չինաստանի ազդեցության հետ։

«Գերմանացի անձնակազմին վտանգի ենթարկելը և գործողությունը խափանելը բացարձակապես անընդունելի է»,- հայտարարել է Գերմանիայի արտաքին գործերի նախարարությունը X-ում գրառմամբ։

Գերմանիայի պաշտպանության նախարարությունն էլ հայտնել է, որ ինքնաթիռը, որը մասնակցում է Կարմիր ծովում միջազգային ծովային ուղիները պաշտպանող ԵՄ ASPIDES առաքելությանը, հոկտեմբերից ի վեր տարածքի հետախուզման համար օգտագործել է բազմասենսոր հարթակ կամ «թռչող աչք»։ Նախարարության խոսնակը հայտնել է, որ չինական ռազմանավը, որը մի քանի անգամ եղել է այդ տարածքում, հուլիսի սկզբին իրականացվող պարբերական առաքելության ժամանակ առանց պատճառի կամ նախնական ծանուցման լազեր է ուղղել ինքնաթիռի ուղղությամբ։

«Լազերի օգտագործմամբ ռազմանավը վտանգի տակ է դրել անձնակազմի և նյութերի անվտանգությունը»,- ասել է խոսնակը՝ հավելելով, որ առաքելության թռիչքը չեղարկվել է նախազգուշական միջոցառումների շրջանակում, և ինքնաթիռը անվտանգ վայրէջք է կատարել Ջիբութիի բազայում։

Չինաստանը նախկինում հերքել է ամերիկյան ինքնաթիռների վրա լազերներ ուղղելու կամ դրանք թիրախավորելու մեղադրանքները։ ՆԱՏՕ-ի եվրոպական անդամի և Չինաստանի միջև միջադեպերն ավելի անսովոր են։

2020 թվականին ԱՄՆ Խաղաղօվկիանոսյան նավատորմը հայտարարել էր, որ չինական ռազմանավը լազեր է արձակել Գուամից արևմուտք գտնվող միջազգային ջրերի օդային տարածքում թռչող ԱՄՆ ռազմածովային պարեկային ինքնաթիռի վրա։ Չինաստանը հայտարարել էր, որ դա իրականությանը չի համապատասխանում։

Թարգմանությունը՝ Էմմա Չոբանյանի