Ուկրաինական ԱԹՍ-ները գրոհել են Մերձմոսկվայի քիմիական գործարանը, Կրասնոդարում անօդաչուն ընկել է նավթավերամշակման գործարանի տարածքում

ՌԴ Կրասնոդարի երկրամասում ուկրաինական անօդաչու թռչող սարքի բեկորներն ընկել են Իլսկի նավթավերամշակման գործարանի տեխնոլոգիական արտադրամասերից մեկի տարածքում։ Այս մասին հայտնել է տարածաշրջանային օպերատիվ շտաբը։ Տուժածներ և ավերածություններ չկան, գրում է Meduza-ն։

Ականատեսների վկայությամբ՝ պայթյունների ձայներ են լսվել Մոսկվայի մարզի Սերգիև Պոսադի Կրասնոզավոդսկ քաղաքում։ Այստեղ է գտնվում ռուսական բանակի մատակարար քիմիական գործարանը։ Ուկրաինական Supernova+ և Exilenova+ տելեգրամ  ալիքները պնդում են, որ գործարանը թիրախավորվել է ուկրաինական անօդաչու թռչող սարքերի կողմից։ Սա պաշտոնապես հաստատված չէ։

Վորոնեժի մարզում էլ անօդաչու թռչող սարքի բեկորներն ընկել են երկաթուղու գծերի վրա, մի քանի գնացքներ ուշացել են։ Մարզի ղեկավար Ալեքսանդր Գուսևի տեղեկացմամբ՝ տուժածներ չկան։

Լիպեցկում անօդաչու թռչող սարքի բեկորները տան տանիք ու մեքենա են վնասել, հայտնել է նահանգապետ Իգոր Արտամոնովը։ Անօդաչու թռչող սարքը հարվածել է կառուցվող ոչ բնակելի բարձրահարկ շենքի։ Տուժածներ չկան։

Բրյանսկի մարզում էլ անօդաչու թռչող սարքի հարձակման հետևանքով վիրավորվել է Կամենսկի Խուտոր գյուղի բնակչուհի։ Տեղական իշխանությունների տվյալներով՝ տուժածը տեղափոխվել է հիվանդանոց։

ՌԴ ՊՆ-ն հայտնում է, որ հուլիսի լույս 7-ի գիշերը Ռուսաստանի ՀՕՊ համակարգերը 14  շրջանում ոչնչացրել և խափանել են 91 ուկրաինական անօդաչու թռչող սարք։ Նշվում է, որ անօդաչուներ են խոցվել Բելգորոդի (20), Կուրսկի (14), Լիպեցկի (9), Բրյանսկի (8) և Վորոնեժի (8) մարզերում: Եվս ութ անօդաչու թռչող սարք ոչնչացվել է Մոսկվայի մարզում, երեքական՝ Նովգորոդի, Տվերի, Տամբովի և Լենինգրադի մարզերի տարածքներում, երկուական՝ Օրյոլի մարզում, մեկական՝ Վլադիմիրի, Կրասնոդարի մարզերում և բռնակցված Ղրիմում: Յոթ անօդաչու թռչող սարք էլ խփվել է Սև ծովի վրա։

Թարգմանությունը՝ Էմմա Չոբանյանի