16.07.2026 | 21:58
ԿԼ. «Ալաշկերտը» վերջին վայրկյաններին փրկվեց պարտությունից ու հաղթեց հետխաղային 11-մետրանոցներով․ ՏԵՍԱՆՅՈՒԹ
Էրդողանն ու Փեզեշքիանը Ստեփանակերտում բանակցություններ են անցկացրել
Քաղաքականություն
04.07.2025 | 19:55
Թուրքիայի նախագահ Ռեջեփ Թայիփ Էրդողանն ու Իրանի նախագահ Մասուդ Փեզեշքիանը այսօր հայաթափված Ստեփանակերտում անցկացված Տնտեսական համագործակցության կազմակերպության 17-րդ գագաթնաժողովի շրջանակում հանդիպում են անցկացրել։ Թուրքիայի նախագահականի հաղորդակցության բաժնի հաղորդմամբ՝ հանդիպման ընթացքում քննարկվել են Թուրքիայի և Իրանի միջև երկկողմ հարաբերությունները, ինչպես նաև տարածաշրջանային հարցեր։
«Նախագահ Էրդողանն ընդգծել է Իրանի և Իսրայելի միջև փաստացի հրադադարը երկարատև հանգստության վերածելու կարևորությունը։ Ընդգծվել է խնդիրները երկխոսության և բանակցությունների միջոցով լուծելու կարևորությունը։ Արտահայտվել է Թուրքիայի պատրաստակամությունը՝ անկեղծորեն կատարել իր պարտականությունները, այդ թվում, անհրաժեշտության դեպքում, միջնորդի դեր ստանձնելու»,- ասվում է հաղորդագրության մեջ։
Ընդգծվել է Թուրքիայի և Իրանի միջև ահաբեկչության դեմ պայքարում համագործակցության ամրապնդման անհրաժեշտությունը։ Նշվել է, որ երկկողմ հարաբերությունների զարգացումը բոլոր ոլորտներում, մասնավորապես, առևտրի ոլորտում, օգտակար է երկու երկրների համար։
Էրդողանին հանդիպմանն ուղեկցել են Թուրքիայի արտաքին գործերի նախարար Հաքան Ֆիդանը, առևտրի նախարար Օմեր Բոլաթը, տրանսպորտի և ենթակառուցվածքների նախարար Աբդուլքադիր Ուրալօղլուն, նախագահականի հաղորդակցության ղեկավար Ֆահրեթթին Ալթունը, նախագահի արտաքին քաղաքականության և անվտանգության հարցերով գլխավոր խորհրդական Ակիֆ Չաղաթայ Քըլըչը։
Թարգմանությունը՝ Էմմա Չոբանյանի
