16.07.2026 | 23:00
Հայաստանի ազգային գրադարանում բացվել է իրանական գրականության անկյուն
ՌԴ-ն ու Ուկրաինան գերիների հերթական փոխանակումն են իրականացրել
Քաղաքականություն
04.07.2025 | 16:30
Ռուսաստանի պաշտպանության նախարարությունը հայտնել է, որ Կիևը Մոսկվային է հանձնել ռուս ռազմագերիների ևս մեկ խմբի՝ փոխարենը Կիևին փոխանցել մի խումբ ուկրաինացի ռազմագերիների։
Նախարարության տվյալներով՝ փոխանակումը տեղի է ունեցել «հունիսի 2-ին Ստամբուլում ձեռք բերված ռուս-ուկրաինական պայմանավորվածությունների համաձայն»։ Գերատեսչությունը չի հայտնել, թե քանի մարդ է մասնակցել փոխանակմանը։
Ուկրաինայի նախագահ Վլադիմիր Զելենսկին հաստատել է փոխանակումը։
«Մեր մարդիկ տանն են։ Նրանց մեծ մասը ռուսական գերության մեջ էր 2022 թվականից ի վեր», – տելեգրամում գրել է Ուկրաինայի նախագահ Վլադիմիր Զելենսկին՝ այդպիսով հաստատելով Ստամբուլի համաձայնագրերի շրջանակներում գերիների փոխանակման նոր փուլը։ Սա հունիսի 9-ին սկսված լայնածավալ փոխանակման ութերորդ փուլն է։
Զելենսկիի խոսքով՝ ուրբաթ օրը Ուկրաինա են վերադառնում Դոնեցկի մարզը և Մարիուպոլի, Լուգանսկի, Խարկովի և Խերսոնի մարզերը պաշտպանած զինվորականները՝ Ուկրաինայի զինված ուժերի, Ազգային գվարդիայի, Պետական սահմանապահ ծառայության զինծառայողները, «ինչպես նաև՝ քաղաքացիական անձինք»։
Հունիսի սկզբին Ստամբուլում կայացած բանակցությունների ժամանակ Ռուսաստանի և Ուկրաինայի պատվիրակությունները համաձայնել էին փոխանակել 18-ից 25 տարեկան ծանր վիրավոր զինվորների և գերիների, ինչպես նաև հանձնել պատերազմում զոհված զինվորների մարմինները: Գերիների փոխանակումը սկսվել է հունիսի 9-ին: Յուրաքանչյուր փուլում ազատ արձակված գերիների թիվը չի հրապարակվել:
Թարգմանությունը՝ Էմմա Չոբանյանի
