Ուկրաինական անօդաչուները Լիպեցկի մարզում, ենթադրաբար, հարձակվել են ԱԹՍ-ների համար մարտկոցներ արտադրող գործարանի վրա․ ՏԵՍԱՆՅՈՒԹ

Ուկրաինայի զինված ուժերը հուլիսի լույս 3-ի գիշերը անօդաչու թռչող սարքերով հարձակվել են ՌԴ Լիպեցկի մարզի վրա, հայտնել է նահանգապետ Իգոր Արտամոնովը, փոխանցում է Meduza-ն։

Նրա խոսքով՝ անօդաչու թռչող սարքի բեկորներն ընկել են Լիպեցկի մարզի մասնավոր բնակելի շենքի վրա։ Զոհվել է տեղի բնակչուհին, երկու մարդ վիրավորվել է։

Արտամոնովի փոխանցմամբ՝ Ելեց քաղաքում անօդաչու թռչող սարք է ընկել ձեռնարկություններից մեկի կայանատեղիում։ Հրդեհ է բռնկվել, որը տեղայնացվել է։ Մոտակա արտադրամասերի աշխատակիցները տարհանվել են, տուժածներ չկան։ Նահանգապետը չի հստակեցրել, թե ինչ ձեռնարկության մասին է խոսքը։ Ուկրաինական Exilenova+ տելեգրամ ալիքը, մինչդեռ, հայտնել է, որ անօդաչու թռչող սարքերը հարձակվել են «Էներգիա»-ի վրա․ այն Ռուսաստանի ամենամեծ ձեռնարկությունն է, որը մասնագիտացած է հոսանքի քիմիական աղբյուրների արտադրության մեջ։ Ձեռնարկությունը, մասնավորապես, արտադրում է մարտկոցներ անօդաչու թռչող սարքերի համար, ինչպես նաև լիթիում-իոնային տարրեր, որոնք օգտագործվում են կապի և ռադիոէլեկտրոնային պայքարի համակարգերում: Ուկրաինայի զինված ուժերն այս գործարանի վրա հարձակվել էին նաև այս տարվա մայիսին:

Տեղի բնակիչները նույնպես հայտնել են, որ հենց այս ձեռնարկությունն է հարձակման ենթարկվել, գրում է ռուսական Astra տելեգրամ ալիքը։

Բացի այդ, ըստ Լիպեցկի մարզի նահանգապետի, անօդաչու թռչող սարքը հարվածել է Ելեցում կառուցվող բնակելի շենքի մի հատվածին, վնասվել են պատուհանները։ Հարակից տների բնակիչները տարհանվել են, ոչ ոք չի տուժել։

Ռուսաստանի Պաշտպանության նախարարության տվյալներով՝ գիշերվա ընթացքում ռուսական ՀՕՊ համակարգերը խոցել են ուկրաինական 69 անօդաչու թռչող սարք, այդ թվում՝ 10-ը՝ Լիպեցկի մարզի տարածքում։

Թարգմանությունը՝ Էմմա Չոբանյանի