05.07.2026 | 01:14
«Ուիմբլդոն». Կարեն Խաչանովը դուրս է մնացել պայքարից
Կառավարությունը զիջեց, բայց ոչ բոլոր հարցերում․ ինչի դիմաց են արցախցիները հանել վրանը հրապարակից. ՏԵՍԱՆՅՈՒԹ
Քաղաքականություն
30.04.2025 | 20:06
Արցախից բռնի տեղահանված անձինք ևս 2 ամիս սոցիալական աջակցության կստանան։ Որոշումն ընդունվեց այսօր Կառավարության նիստում, չզեկուցվող հարցերի փաթեթով։ Բնակվարձի փոխհատուցման 40+10 ծրագրի դադարեցումը դժգոհությունների առիթ էր դարձել արցախցիների շրջանում։
Ուղիղ մեկ ամիս առաջ Ազատության հրապարակում անցկացված հանրահավաքի ժամանակ Արցախցիների իրավունքների պաշտպանության խորհուրդը 12 կետից բաղկացած պահանջագիր ներկայացրեց Կառավարությանը։ Ակտիվիստները նաև վրան տեղադրեցին՝ ամենօրյա իրազեկումների համար։ Սրան հաջորդեցին փոխվարչապետ Տիգրան Խաչատրյանի, Կառավարության այլ անդամների և խորհրդի ներկայացուցիչների միջև աջակցության ծրագրի ժամկետի երկարաձգման, բնակարանային ֆոնդի հետ կապված քննարկումները։
Արցախցիների իրավունքների պաշտպանության խորհրդի անդամ Նժդեհ Իսկանդարյանի խոսքով՝ Խորհրդի առաջարկած երկու կետում Կառավարությունը զիջման չի գնացել։ Կառավարության հետ ձեռք բերված պայմանավորվածության արդյունքում Արցախցիների իրավունքների պաշտպանության խորհուրդը երեկ Ազատության հրապարակից հեռացրեց վրանը։ Իսկանդարյանն ընդգծում է՝ կաշկանդված չեն, եթե Կառավարությունը չպահի իր տված երաշխիքները, կարող են կրկին հանրահավաքներ իրականացնել, և ոչ թե մեկ վրան, այլ վրաններ տեղադրել տարբեր վայրերում։
Իսկանդարյանի խոսքով՝ հետագա գործունեությունը շարունակելու համար Խորհուրդը ֆինանսական խնդիրներ ունի։ Այժմ քննարկվում է Արցախի վերջին նախագահ Սամվել Շահրամանյանի՝ Արցախի ներկայացուցչության շենքում տարածք տրամադրելու առաջարկը։
Կառավարությունը, միաժամանակ, 2 ամսով հետաձգում է կարիքավորության հիմքով լրացուցիչ սոցիալական աջակցության տրամադրման ծրագիրը, որն ընդունել էր ապրիլի 10-ին և տրվելու էր ընտանիքի մեկ անդամի համար ամսական 55 հազար դրամից ցածր եկամուտ ունեցող ընտանիքներին։
Մանրամասները՝ տեսանյութում։
Անի Թամրազյան
