12.03.2026 | 22:53
Միրզոյանը և Կասիսը կարճ զբոսնել են Բեռնի պատմական հատվածում
Թրամփը կրկին Պուտինին կոչ է արել «դադարեցնել կրակոցները և գործարք կնքել»
Քաղաքականություն
28.04.2025 | 11:50
ԱՄՆ նախագահ Դոնալդ Թրամփը կրկին կոչ է արել ՌԴ նախագահ Վլադիմիր Պուտինին խաղաղությանը նվիրվածություն ցուցաբերել և դադարեցնել ռազմական գործողություններն Ուկրաինայում, գրում է BBC-ի ռուսական ծառայությունը։
«Ես ուզում եմ, որ նա դադարեցնի կրակել, նստի և ստորագրի համաձայնագիրը։ Կարծում եմ՝ մենք ունենք գործարք կնքելու պայմանները, և ես ուզում եմ, որ նա ստորագրի այն, ավարտի սա ևվերադառնա նորմալ կյանքին»,- լրագրողներին ասել է Թրամփը։
Ավելի վաղ ԱՄՆ նախագահը հայտարարել էր, որ Պուտինը «որևէ պատճառ չուներ հրթիռներ արձակելու քաղաքացիական շրջանների, քաղաքների և բնակավայրերի վրա վերջին մի քանի օրերին»։
«Դա ինձ ստիպում է մտածել, որ հնարավոր է՝ նա չի ցանկանում դադարեցնել պատերազմը»,- գրել էր Թրամփը սոցցանցերում։
Ռուսական բանակի կողմից Կիևի վրա հրթիռային ու անօդաչուների հարձակումից հետո էլ Թրամփը Պուտինին կոչ էր արել կանգ առնել։
Բացի այդ, ԱՄՆ նախագահւ հայտարարել է, որ Վատիկանում Ուկրաինայի նախագահ Վլադիմիր Զելենսկիի հետ իր հանդիպումը «լավ է անցել»։
«Կարծում եմ՝ հանդիպումը լավ է անցել։ Տեսնենք, թե ինչ կլինի հաջորդ մի քանի օրերին։ Հնարավոր է՝ մենք շատ նոր բաներ իմանանք։ Ես շատ հիասթափված էի, որ հրթիռները ռուսական կողմից էին»,- նշել է Թրամփը։
Նա հավելել է, որ կարծում է, որ Զելենսկին հետաքրքրված է խաղաղության համաձայնագրի ձեռքբերմամբ։ Միաժամանակ, Թրամփը հայտարարել է, որ կարծում է՝ Վլադիմիր Զելենսկին պատրաստ է Ղրիմը զիջել Ռուսաստանին՝ որպես խաղաղության համաձայնագրի մաս, չնայած նման ցանկացած առաջարկ Կիևի կողմից նախկինում մերժվել է։ Նա ընդգծել է՝ Զելենսկիի հետ հանդիպմանը Ղրիմի հարցը քննարկվել է «շատ կարճ»։
Ուկրաինան բազմիցս մերժել է որևէ տարածքային զիջում՝ ընդգծելով, որ տարածքային հարցերը պետք է քննարկվեն միայն հրադադարի համաձայնեցումից հետո։ Զելենսկին էլ բազմիցս հայտարարել է, որ Ուկրաինան չի պատրաստվում հրաժարվել Ղրիմի նկատմամբ իր պահանջներից, այդ թվում՝ այն պատճառով, որ թերակղզու՝ երկրի կազմում լինելը ամրագրված է երկրի Սահմանադրությամբ։
Ո՛չ Զելենսկին, ո՛չ Ռուսաստանի նախագահ Վլադիմիր Պուտինը հրապարակայնորեն չեն արձագանքել Թրամփի վերջին մեկնաբանություններին։
Թարգմանությունը՝ Էմմա Չոբանյանի
