Թուրքիան դեմ է Իրանում քաղաքացիական պատերազմ հրահրելու ցանկացած ծրագրի. Ֆիդան

Թուրքիայի արտաքին գործերի նախարար Հաքան Ֆիդանը հայտարարել է, որ Անկարան դեմ է Իրանում ներքին հակամարտություն հրահրելու ցանկացած փորձի, գրում է Turkiye today-ը։

«Մենք դեմ ենք ցանկացած ծրագրի, որը նպատակ ունի քաղաքացիական պատերազմ հրահրել Իրանում կամ հակամարտություններ հրահրել էթնիկ կամ կրոնական բաժանարար գծերով»,- ասել է Ֆիդանը Անկարայում գերմանացի գործընկեր Յոհան Վադեֆուլի հետ հանդիպումից հետո մամուլի ասուլիսի ժամանակ։

Ֆիդանը նաև զգուշացրել է, որ Իրանում անջատողականությունը խրախուսելուն ուղղված սցենարներ են բարձրացվում։

«Կարևոր է, որ բանակցությունները շարունակվեն առանց ընդհատումների։ Մեր երկիրը կշարունակի համագործակցել բոլոր կողմերի հետ՝ հանուն խաղաղության։ Մենք պատրաստ ենք հյուրընկալել բանակցությունների հաջորդ փուլը»,- ասել է նա։

Միաժամանակ, թուրք պաշտոնյան կոչ է արել անհապաղ դադարեցնել Իսրայելի կողմից հարևան Լիբանանի ռմբակոծությունները։

«Իսրայելը, որը վարում է էքսպանսիոնիստական ​​քաղաքականություն, իր կեղտոտ պատերազմը բերում է Լիբանան։ Իսրայելի հարձակումները պետք է դադարեցվեն՝ նախքան Լիբանան պետության փլուզումը»,- ասել է նա։

Մերձավոր Արևելքում լարվածությունն առաջացել է այն բանից հետո, երբ Իսրայելը և ԱՄՆ-ն փետրվարի 28-ին համատեղ հարձակումներ սկսեցին Իրանի վրա, որոնց հետևանքով մինչ օրս զոհվել է ավելի քան 1300 մարդ, այդ թվում՝ երկրի նախկին գերագույն առաջնորդ Ալի Խամենեին և ավելի քան 150 երեխա։ Իսրայելի և ԱՄՆ-ի հարձակումների հետևանքով վիրավորվել է նաև ավելի քան 10,000 մարդ։

Թեհրանը հակադարձում է անօդաչու թռչող սարքերով և հրթիռներով հարվածներով՝ ուղղված Իսրայելին, Հորդանանին, Իրաքին և Պարսից ծոցի մի քանի երկրների, որտեղ տեղակայված են ԱՄՆ ռազմական օբյեկտներ։

Թարգմանությունը՝ Էմմա Չոբանյանի