17.12.2025 | 17:25
Կիևի «Դինամոն» գլխավոր մարզիչ է նշանակել «Նոայի» դեմ խաղից առաջ
ԱՄՆ Պետդեպը փակել է ապատեղեկատվության դեմ պայքարի ստորաբաժանումը
Քաղաքականություն
17.04.2025 | 13:55
ԱՄՆ Պետքարտուղարության արտաքին տեղեկատվական միջամտության դեմ պայքարի (R/FIMI) ստորաբաժանումը դադարեցնում է իր գործունեությունը։ Այս մասին հայտարարել է ԱՄՆ պետքարտուղար Մարկո Ռուբիոն։
«Խոսքի և արտահայտվելու ազատությունը եղել է Ամերիկայի քաղաքացի լինելու անկյունաքարը։ Դարեր շարունակ Միացյալ Նահանգները հույսի փարոս է ծառայել աշխարհի միլիոնավոր մարդկանց համար։ Այնուամենայնիվ, վերջին տասնամյակի ընթացքում Ամերիկայում մարդիկ զրպարտվել են, աշխատանքից ազատվել, մեղադրանքներ են առաջադրվել և նույնիսկ բանտարկվել պարզապես իրենց կարծիքն արտահայտելու համար։ Սա այն Ամերիկան չէ, որը մեր հիմնադիր հայրերը կճանաչեին»,- ասվում է Ռուբիոյի հայտարարության մեջ։
Նա նշում է, որ կառավարության յուրաքանչյուր պաշտոնյայի պարտականությունն է անընդհատ աշխատել ամերիկացիների խոսքի ազատությունը պահպանելու և պաշտպանելու ուղղությամբ։
«Դրա համար էլ ես այսօր հայտարարում եմ Պետդեպարտամենտի արտաքին տեղեկատվության մանիպուլյացիայի և միջամտության դեմ պայքարի (R/FIMI) բաժնի փակման մասին, որը նախկինում հայտնի էր որպես Գլոբալ ներգրավվածության կենտրոն (GEC): Նախորդ վարչակազմի օրոք այս գրասենյակը, որը հարկատուներին տարեկան արժեցել էր ավելի քան 50 միլիոն դոլար, միլիոնավոր դոլարներ էր ծախսում ամերիկացիների ձայները ակտիվորեն լռեցնելու և գրաքննելու համար, որոնց նրանք պետք է ծառայեին: Սա հակասում է այն սկզբունքներին, որոնք մենք պետք է պաշպանենք, և անհավանական է, որ դա տեղի էր ունենում Ամերիկայում։ Այն այսօր ավարտվում է»,- նշում է ԱՄՆ պետքարտուղարը՝ հավելելով, որ նախագահ Թրամփի վարչակազմի օրոք մենք միշտ կաշխատենք պաշտպանել ամերիկյան ժողովրդի իրավունքները, և դա կարևոր քայլ է այդ պարտավորության կատարման շարունակականության ուղղությամբ։
Հավելենք, որ ԱՄՆ Պետդեպարտամենտի Գլոբալ ներգրավվածության կենտրոնը ստեղծվել է 2011 թվականին՝ ահաբեկչական խմբավորումների քարոզչության դեմ պայքարի համար։ 2024 թ-ին կենտրոնի բազայի վրա բացվել է Արտաքին տեղեկատվական մանիպուլյացիայի և միջամտության դեմ պայքարի գրասենյակը, որը պետք է հակազդեր արտասահմանյան ապատեղեկատվական արշավներին, այդ թվում՝ Ռուսաստանից, Իրանից և Չինաստանից։
ԱՄՆ նախագահ Դոնալդ Թրամփի համախոհները քննադատել էին գրասենյակի հիմնումը՝ մեղադրելով գրաքննության մեջ։ Իլոն Մասկն այն անվանել էր «սպառնալիք ժողովրդավարությանը»։
Թարգմանությունը՝ Էմմա Չոբանյանի
