23.04.2026 | 17:51
ՌԴ-ն եվրոպական երկրներին մեղադրել է, իբր, «Կալինինգրադի գրավմանը նախապատրաստվելու մեջ»
«Ես Պուտինին կսպասեմ հինգշաբթի օրը՝ Թուրքիայում»․ Վլադիմիր Զելենսկի
Քաղաքականություն
11.05.2025 | 21:23
Ուկրաինայի նախագահ Վլադիմիր Զելենսկին, ի պատասխան ԱՄՆ նախագահ Դոնալդ Թրամփի այն գրառման, որ Ուկրաինան պետք է մայիսի 15-ին Թուրքիայում բանակցություններ վարի առանց նախնական հրադադարի, ասել է, որ նրանք դեռևս սպասում են մայիսի 12-ից սկսած լիակատար հրադադարի, և ինքը անձամբ է Պուտինին սպասելու Թուրքիայում։
«Մենք վաղվանից հրադադար ենք ակնկալում՝ ամբողջական և երկարատև, որը կապահովի դիվանագիտության համար անհրաժեշտ հիմքը։ Սպանությունները հետաձգելու իմաստ չկա։
Եվ ես Պուտինին կսպասեմ հինգշաբթի օրը՝ Թուրքիայում։ Անձամբ եմ այնտեղ լինելու։ Հուսով եմ, որ այս անգամ ռուսները չեն փնտրի պատճառներ, թե ինչու չեն կարող»,-նշել է Զելենսկին։
Հիշեցնենք՝ Ռուսաստանի նախագահ Վլադիմիր Պուտինը անցած գիշեր առաջարկել է Ուկրաինային մայիսի 15-ին Ստամբուլում ուղիղ բանակցություններ անցկացնել՝ առանց նախապայմանների՝ «հակամարտության պատճառները վերացնելու, և պատմական հեռանկարում երկարաժամկետ, ամուր խաղաղություն հաստատելու» նպատակով։ Այս կերպ նա արձագանքել է Ուկրաինայի և չորս եվրոպական երկրների կողմից մայիսի 12-ից 30-օրյա հրադադարի առաջարկին, թեև այն բացահայտ չի մեկնաբանել։
Ավելի ուշ ՌԴ ԱԳՆ-ում ընդգծել են, որ Ռուսաստանը պնդում է նախ Ստամբուլում Ուկրաինայի հետ բանակցությունների անցկացման անհրաժեշտությունը՝ մինչև երկարաժամկետ հրադադարի հնարավոր հաստատումը։
Թրամփն էլ հայտարարել է, որ Ուկրաինան պետք է անհապաղ համաձայնվի ՌԴ-ի՝ հանդիպմա վերաբերյալ առաջարկին։
«Ուկրաինան պետք է անհապաղ համաձայնվի դրան: Առնվազն նրանք կկարողանան որոշել, թե արդյոք հնարավոր է համաձայնություն, իսկ եթե ոչ, ապա եվրոպացի առաջնորդները և ԱՄՆ-ը կիմանան, թե ինչպիսին է իրադրությունը և կարող են համապատասխանաբար գործել:
Ես սկսում եմ կասկածել, որ Ուկրաինան գործարքի կգնա Պուտինի հետ, որը չափազանց զբաղված է Երկրորդ համաշխարհային պատերազմում տարած հաղթանակը տոնելով, որում հնարավոր չէր հաղթել (ընդհանրապես հնարավոր չէր) առանց Ամերիկայի Միացյալ Նահանգների։ ՍԿՍՈՒՄ ԵՆՔ ՀԱՆԴԻՊՈՒՄԸ, ՀԵՆՑ ՀԻՄԱ՛» – նշել է ԱՄՆ նախագահը:
