Պատասխաններ տվողները շատ են, հարցը ձևակերպողների պակաս կա. ապաքաղաքական զրույց Արա Խզմալյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է արվեստաբան, Մատենադարանի տնօրեն և Հանրային խորհրդի նախագահ Արա Խզմալյանը: Նրա կարծիքով՝ Մատենադարանն այն հաստատությունն է, որը պետք է լինի մեր ժողովրդի մշակութային հիգիենայի մի մասը: Այդ առումով նա կարևորում է թե՛ գիտելիքի և մշակութային արժեքների հանրահռչակումը, թե՛ բուն գիտությունը:

Անդրադառնալով մոտ 10 տարի իր գրած «Հարցականի տակ» գրքին և պատասխանելով հարցին՝ արդյո՞ք այժմ հարցականները մնում են, Արա Խզմալյանը նշում է, որ այս ընթացքում շատացել են պատասխաններ տվողները, բայց քիչ են հարցը ճիշտ ձևակերպողները: Դա վերաբերում է ոչ միայն արվեստին, այլև կյանքի բոլոր բնագավառներին:

Ըստ թատերագետի՝ երբ բոլորն անընդհատ խոսում են, կորում է, խեղաթյուրվում է բառերի իմաստը, և այժմ կարիք կա այդ իմաստները վերականգնելու, իսկ երբեմն՝ նաև պարզապես լռելու և կենտրոնանալու:

Խոսելով Հանրային խորհրդի մասին, որի ղեկավարությունը նա վերջերս ստանձնել է, հաղորդման հյուրը կարծիք է հայտնում, որ այդ կառույցի առաքելությունը ոչ թե հեղինակություններին, այլ պրոֆեսիոնալներին հավաքելն է: Այդ պրոֆեսիոնալները պետք է իրենց այլընտրանքային փորձագիտական կարծիքը տան կարևոր պետական խնդիրների վերաբերյալ:

Արա Խզմալյանը վստահ է, որ հայրենասիրությունը նախևառաջ պրոֆեսիոնալիզմն է:

«Առանց պրոֆեսիոնալիզմի հայրենասիրությունը կործանարար է»,- կարծում է արվեստաբանը:

Մանրամասները՝ տեսանյութում:

Արամ Աբրահամյան