30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Թրամփը դիտարկում է ՌԴ-ի դեմ ագրեսիվ պատժամիջոցների կիրառման հնարավորությունը՝ հրադադարի բանակցությունները ձգձգելու համար
Քաղաքականություն
02.04.2025 | 10:16
ԱՄՆ նախագահ Դոնալդ Թրամփը կարծում է, որ Ռուսաստանի իշխանությունները «ձգձգում են բանակցությունները» Ուկրաինայում հրադադարի շուրջ։ Այս մասին հայտնել է Fox News-ի լրագրող Ջեքի Հենրիխը՝ վկայակոչելով քննարկումներին ծանոթ աղբյուրին։
«Թրամփը կարծում է, որ Պուտինը ժամանակ է ձգում։ Վարչակազմը դիտարկում է ագրեսիվ պատժամիջոցների կիրառման հնարավորությունը, ներառյալ՝ Ռուսաստանի «ստվերային նավատորմի» նկատմամբ»,- ասել է աղբյուրը։
Նա հավելել է, որ նախագահ Թրամփը հիասթափված է Պուտինից և կարծում է, որ Ռուսաստանը «դանդաղեցնում է համապարփակ հրադադարի շուրջ բանակցությունները։
«Քննարկվում է առաջ գնալու հարցը։ Ինձ ասել են, որ պատժամիջոցների պահպանման մակարդակը ներկայում ցածր է, ոչ պաշտոնապես՝ գնահատվում է «10-ից 3», և որ Բալթիկ ծովով անօրինական նավթ տեղափոխող Ռուսաստանի «ստվերային նավատորմի» գործունեության խափանումը կարող է ճնշման հեշտ թիրախ լինել»,-X-ի իր միկրոբլոգում գրել է լրագրողը։
Սպիտակ տան մամուլի քարտուղար Քերոլայն Լևիթն էլ ճեպազրույցում լրագրողներին ասել է, որ Թրամփը հիասթափված է և՛ ՌԴ նախագահ Վլադիմիր Պուտինից, և՛ Ուկրաինայի նախագահ Վլադիմիր Զելենսկիից։
«Նա ցանկանում է, որ այս պատերազմն ավարտվի: Երկու կողմից էլ մարդիկ են մահանում, և դա շատ երկար է տևում: Մեր թիմը շարունակում է աշխատել ինչպես ռուսների, այնպես էլ ուկրաինացիների հետ»,- նշել է նա։
Հիշեցնենք, որ NBC-ից լրագրող Քրիստեն Ուելքերն ավելի վաղ հայտնել էր, թե Թրամփը զանգահարել է իրեն՝ արտահայտելու իր զայրույթն այն բանի համար, որ Պուտինը կասկածի տակ է դնում Ուկրաինայի նախագահ Վլադիմիր Զելենսկիի՝ որպես առաջնորդի ապագան։
Թրամփն իր հերթին հայտարարել էր, որ չէր ցանկանա երկրորդական մաքսատուրքեր սահմանել ռուսական նավթի համար, սակայն ստիպված կլինի դա անել, եթե Ուկրաինայում իրավիճակի կարգավորման հարցում առաջընթաց չգրանցվի։
«Ես չեմ ցանկանում երկրորդական մաքսատուրքեր սահմանել նրա նավթի համար, սակայն կարծում եմ՝ կանեի դա, եթե համարեի, որ նա գործից գլուխ չի հանում։ Ես դա արել եմ Վենեսուելայի հետ։ Ուզում եմ՝ նա ավարտի պատերազմը, որ ռուս և ուկրաինացի զինծառայողների սպանությունը դադարեցվի»,- նշել էր ԱՄՆ նախագահը։
Թարգմանությունը՝ Էմմա Չոբանյանի
