Վարդան Ղուկասյանին վերագրվող հայհոյախառն ձայնագրության առնչությամբ քրեական վարույթ է նախաձեռնվել

Վարդան Ղուկասյանին վերագրվող հայհոյախառն ձայնագրության առնչությամբ քրեական վարույթ է նախաձեռնվել Կոմունիստական կուսակցության ցուցակով Գյումրիի համայնքապետի թեկնածու առաջադրված Վարդան Ղուկասյանին վերագրվող հայհոյախառն ձայնագրության առնչությամբ քրեական վարույթ է նախաձեռնվել: Այս մասին FactorTV-ի հարցմանն ի պատասխան տեղեկացրին Գլխավոր դատախազությունից։

«Քրեական վարույթը նախաձեռնվել է Քրեական օրենսգրքի 236-րդ հոդվածի 2-րդ մասով՝ օրինական կամ անօրինական հավաքին մասնակցելուն հարկադրելն անձի կամ նրա մերձավոր ազգականի կամ մերձավորի նկատմամբ բռնություն գործադրելու, գույքը ոչնչացնելու, վնասելու կամ վերցնելու սպառնալիքով կամ շանտաժի միջոցով, ինչպես նաև հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելու հոդվածի հատկանիշներով»,- նշեց Գլխավոր դատախազի խորհրդական Լուսինե Մարտիրոսյանը։

Հիշեցնենք՝ մարտի 26-ին համացանցում 28 վայրկյան տևողությամբ ձայնագրություն տարածվեց, որը ներկայացվում է որպես Ղուկասյանի հեռախոսազրույց անհայտ մի անձի հետ։ Ըստ ձայնագրության, զրուցակիցը Ղուկասյանին ասել է, որ մի խումբ մարդկանց հետ գալու է նրա մոտ, ինչին ի պատասխան հնչել է հայհոյախառն խոսք. «Ասա՝ պո*նիկներ, էդ սաղ ինքն է ձեզի տվել, հիմի, որ ձեր տները կպահենք էդ ինքն է ձեզի տվել, գ*ո*եր»։ Factor TV-ի հետ հեռախոսազրույցում Ղուկասյանը փորձել էր հերքել, թե ինքն է խոսում՝ նշելով՝ ձայնագրությունը արհեստական բանականության կողմից է սարքված։ Արդեն ավելի ուշ Վարդան Ղուկասյանն անուղղակի հաստատել էր. «Եթե Գյումրու քաղաքապետը քիֆիր անել չգիտե, ուրեմն վռնդեք քաղաքից, հիմա իմ ռեյտինգն ավելի բարձրացրիք էդ գցելով»,- ասել էր նա։ Նույն օրը Գլխավոր դատախազություն ուսումնասիրություն էր սկսել, ավելի ուշ «Անկախ դիտորդ» դիտորդական առաքելությունն էլ իր հերթին հանցագործության մասին հաղորդում էր ներկայացրել։

Ռոզա Վարդանյան