13.03.2026 | 11:56
Ալի Խամենեիի կինը ողջ է. հաղորդվել էր ամուսնու հետ նրա մահվան մասին. Fars
Բայրամովը ԵՄ պաշտոնյաներին բողոքել է ՀՀ Սահմանադրությունից և սպառազինումից
Քաղաքականություն
01.04.2025 | 19:56
Ադրբեջանի արտաքին գործերի նախարար Ջեյհուն Բայրամովը Բաքվում հանդիպել է Եվրոպական արտաքին գործողությունների ծառայության տնտեսական և գլոբալ հարցերով գլխավոր քարտուղարի տեղակալ Սայմոն Մորդուին և Հարավային Կովկասում և Վրաստանի ճգնաժամի հարցերով ԵՄ հատուկ ներկայացուցիչ Մագդալենա Գրոնոյին։
Հանդիպման ընթացքում քննարկվել են Ադրբեջանի և Եվրամիության համագործակցության ներկա վիճակն ու հեռանկարները, ինչպես նաև երկկողմ հետաքրքրություն ներկայացնող տարածաշրջանային և միջազգային հարցեր։
Բայրամովը մանրամասն տեղեկություններ է հաղորդել նաև հետհակամարտային տարածաշրջանում առկա իրավիճակի և իրողությունների մասին՝ նշելով, թե Բաքուն ներկայում լայնածավալ վերականգնողական և շինարարական աշխատանքներ է իրականացնում «օկուպացիայից ազատագրված տարածքներում»։ Քննարկվել են նաև ականազերծման և անհետ կորածների ճակատագրի ճշտման ոլորտում Եվրամիության հետ համագործակցության հարցեր։
«Նշվել է, որ չնայած Ադրբեջանի և Հայաստանի միջև հարաբերությունների կարգավորման ու խաղաղ կարգավորման գործընթացում առաջընթացին՝ Հայաստանի Սահմանադրության մեջ մնացած տարածքային պահանջները մեր երկրի նկատմամբ, ինչպես նաև այդ երկրի արագ սպառազինումը վտանգ են ներկայացնում խաղաղության օրակարգի առաջխաղացման համար»,- ասվում է Ադրբեջանի ԱԳՆ-ի տարածած հաղորդագրությունում։
Թարգմանությունը՝ Էմմա Չոբանյանի
