Քաղաքականություն
28.03.2025 | 12:08
ԱՄՆ պետքարտուղար Մարկո Ռուբիոն հայտարարել է, որ Թուրքիայի արտգործնախարար Հաքան Ֆիդանի հետ հանդիպմանը մտահոգություն է հայտնել Ստամբուլի քաղաքապետ Էքրեմ Իմամօղլուի ձերբակալությունից հետո երկրում անցկացվող բողոքի ակցիաների և ձերբակալությունների կապակցությամբ, գրում է Reuters-ը։
Թուրքիայի նախագահ Թայիփ Էրդողանի քաղաքական մրցակցի ձերբակալությունը հարուցել է վերջին տասնամյակի ամենազանգվածային հակակառավարական ցույցերը, որոնք զանգվածային ձերբակալությունների պատճառ դարձել են ամբողջ երկրում:
«Մենք հետևում ենք, մտահոգություն ենք հայտնել, մեզ դուր չի գալիս նման անկայունություն տեսնել որևէ երկրի կառավարման մեջ, որն այդքան մերձավոր դաշնակից է։ Մենք, անշուշտ, մտահոգված ենք այս բողոքի ակցիաներով և որոշ հաղորդումներով»,- ասել է Ռուբիոն լրագրողներին։
Ռուբիոն և Ֆիդանը հանդիպել են Վաշինգտոնում երեքշաբթի՝ ԱՄՆ նախագահի վարչակազմի հետ ավելի ջերմ հարաբերություններ հաստատելու՝ Անկարան ձգտման ֆոնին։
«Ես մտահոգություն հայտնեցի Թուրքիայում վերջերս տեղի ունեցած ձերբակալությունների և բողոքի ցույցերի վերաբերյալ», – գրել էր Ռուբիոն X-ի օգտահաշվում Ֆիդանի հետ հանդիպումից հետո, սակայն թուրքական դիվանագիտական աղբյուրը վիճարկել էր այս հայտարարությունը։
«Ես այդ հարցը բարձրացրել եմ արտաքին գործերի նախարարի մոտ և ճիշտ այն բառերով, որոնք հիմա օգտագործում եմ»,- ասել է Ռուբիոն։
Նա հավելել է, որ ԱՄՆ-ը մտադիր չէ մեկնաբանել Թուրքիայի «յուրաքանչյուր» ներքաղաքական հարց։ Ռուբիոն նաև նշել է, որ Դոնալդ Թրամփը «շատ լավ աշխատանքային հարաբերություններ ուներ Էրդողանի հետ առաջին վարչակազմում»:
«Նրանք կցանկանային վերականգնել դրանք։ Նրանք ՆԱՏՕ-ի դաշնակից են, մենք կցանկանայինք նրանց հետ համագործակցել Սիրիայում և այլ վայրերում»,- ասել է ԱՄՆ պետքարտուղարը։
Ավելի վաղ թուրքական դիվանագիտական աղբյուրները հայտնել էին, թե Ռուբիոն իրականում մտահոգություն չի հայտնել վերջերս Թուրքիայում տեղի ունեցած ձերբակալությունների և բողոքի ցույցերի վերաբերյալ։
Թուրքիայի ներքին գործերի նախարար Ալի Երլիքայան էլ ասել է, որ անցած չորեքշաբթի բողոքի ցույցերից հետո ձերբակալվել է 1879 մարդ, որոնցից 260-ը կալանավորվել են։
Թարգմանությունը՝ Էմմա Չոբանյանի
