Քաղաքականություն
27.03.2025 | 21:19
Բաքվի Յասամալի շրջանում շինարարական կազմակերպությունը սկսել է բնակելի շենքը քանդել այն ժամանակ, երբ մարդիկ ներսում են եղել։ Միջադեպի կադրերը տարածվում են սոցցանցերի ադրբեջանական տիրույթում։
Ադրբեջանական լրատվամիջոցները գրում են, որ մի քանի բնակիչների ինքնազգացողությունը վատացել է։ Բնակիչները չեն լքել իրենց տները, քանի որ համաձայն չեն ընկերության առաջարկած փոխհատուցման հետ։
Ադրբեջանի ՆԳՆ-ից հայտնում են, որ տարածքում ապօրինի քանդման աշխատանքների հետ կապված ձերբակալվել են շինարարական ընկերության աշխատակիցը և էքսկավատորի վարորդը։ Դեպքի առթիվ հարուցվել է քրեական գործ, կատարվում է հետաքննություն։
Քաղաքաշինության և ճարտարապետության պետական կոմիտեին կից Բաքվի ճարտարապետության և քաղաքաշինության գլխավոր վարչությունը տարածքի ստուգում է անցկացրել և պարզել, որ շենքի քանդման աշխատանքներն իրականացվել են առանց համապատասխան թույլտվության։
Թարգմանությունը՝ Էմմա Չոբանյանի
