08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Կրեմլը հրապարակել է էներգետիկ օբյեկտների ցանկը, որոնց վրա չհարձակվելու համաձայնության են եկել ԱՄՆ-ն ու ՌԴ-ն
Քաղաքականություն
26.03.2025 | 11:45
ՌԴ նախագահի աշխատակազմը հրապարակել է Ռուսաստանում և Ուկրաինայում «ռուսական և ամերիկյան կողմերի միջև համաձայնեցված օբյեկտների» ցանկը, որոնց նկատմամբ կիրառվում է էներգետիկ համակարգի վրա հարձակումների ժամանակավոր մորատորիում, գրում է Meduza-ն։
Այդ ցանկում ներառվել են նավթավերամշակման ձեռնարկություններ, նավթատարներ, գազատարներ և պահեստարաններ, ներառյալ՝ պոմպակայանները, էլեկտրաէներգիայի արտադրության և փոխանցման ենթակառուցվածքներ, ներառյալ՝ էլեկտրակայանները, ենթակայանները, տրանսֆորմատորները և բաշխիչները, ատոմակայանները, հիդրոէլեկտրակայանները։
Հայտարարության մեջ ասվում է, որ ժամանակավոր մորատորիումը «գործելու է 30 օր՝ սկսած 2025 թվականի մարտի 18-ից», և կարող է երկարաձգվել, եթե կողմերը համաձայնեն դրանում։
«Եթե կողմերից մեկը խախտի մորատորիումը, ապա մյուս կողմն իրավունք ունի իրեն ազատ համարել այն կատարելու պարտավորություններից»,- ընդգծել է Կրեմլը։
Ուկրաինայի նախագահ Վլադիմիր Զելենսկին էլ հայտարարել է, որ էներգետիկ օբյեկտներին հարվածները դադարեցնելու մասին համաձայնությունը գործում է մարտի 25-ից։
Սպիտակ տունն ավելի վաղ հայտնել էր, որ ԱՄՆ-ն Ուկրաինայի և Ռուսաստանի հետ պայմանավորվել է անվտանգ նավարկություն ապահովելու և Սև ծովում ուժի կիրառումը բացառելու վերաբերյալ։
Կրեմլն էլ հայտարարել է, որ ծովում հրադադարը կհաստատվի Ռոսսելխոզբանկի և պարեն արտադրողների դեմ պատժամիջոցների վերացումից հետո։
Թարգմանությունը՝ Էմմա Չոբանյանի
