19.02.2026 | 15:02
Բագրատ արքեպիսկոպոս Գալստանյանի և մյուսների գործով դատական նիստը. ՈՒՂԻՂ
ԱՄՆ-ը հայտարարել է, որ Սև ծովում անվտանգ նավարկության և էներգետիկ ենթակառուցվածքներին հարվածների արգելքի շուրջ համաձայնություն է ձեռք բերվել
Քաղաքականություն
25.03.2025 | 20:06
Սպիտակ տունը հայտարարություններ է տարածել Ռուսաստանի և Ուկրաինայի պատվիրակությունների հետ Սաուդյան Արաբիայի մայրաքաղաք Էր Ռիադում անցկացված բանակցությունների արդյունքների վերաբերյալ։ Մասնավորապես, նշվում է, որ ԱՄՆ-ը և Ռուսաստանը պայմանավորվել են ապահովել անվտանգ նավարկություն և բացառել ուժի կիրառումը Սև ծովում։ ԱՄՆ-ը նույն հարցի շուրջ համաձայնության է եկել նաև Ուկրաինայի հետ։
Բացի այդ, Միացյալ Նահանգները և Ուկրաինան պայմանավորվել են կանխել առևտրային նավերի օգտագործումը Սև ծովում ռազմական նպատակներով։ Կողմերը համաձայնել են, որ ԱՄՆ-ը հավատարիմ է մնում ռազմագերիների փոխանակման, քաղաքացիական կալանավորների ազատման և բռնի տեղահանված ուկրաինացի երեխաների վերադարձին նպաստելու հարցերին։
ԱՄՆ-ը և Ուկրաինան պայմանավորվել են նաև միջոցներ մշակել՝ իրականացնելու նախագահ Թրամփի և նախագահ Զելենսկիի համաձայնությունը՝ արգելելու Ռուսաստանի և Ուկրաինայի էներգետիկ օբյեկտներին փոխադարձաբար հարվածելը։
Միաժամանակ, Վաշինգտոնը խոստացել է օգնել վերականգնել Ռուսաստանի մուտքը դեպի համաշխարհային շուկա գյուղատնտեսական արտադրանքի և պարարտանյութերի արտահանման համար, նվազեցնել ծովային ապահովագրության ծախսերը և բարելավել մուտքը նավահանգիստները։
ԱՄՆ-ը և Ռուսաստանը պայմանավորվել են նաև միջոցներ մշակել՝ իրականացնելու նախագահ Թրամփի և նախագահ Պուտինի՝ Ռուսաստանի և Ուկրաինայի էներգետիկ օբյեկտներին հարվածներն արգելելու մասին համաձայնագիրը։
Միացյալ Նահանգները, ՌԴ-ն և Ուկրաինան ողջունում են երրորդ կողմերի միջնորդությունը էներգետիկ և ծովային համաձայնագրերի իրականացման համար: Կողմերը նաև շարունակելու են աշխատել տևական և կայուն խաղաղության հասնելու ուղղությամբ։
Միացյալ Նահանգները երկու կողմերին կրկնել է նախագահ Դոնալդ Թրամփի ցանկությունը՝ վերջ դնելու ռուս-ուկրաինական հակամարտության ընթացքում երկու կողմերի սպանություններին՝ որպես կայուն խաղաղ կարգավորման հասնելու համար անհրաժեշտ քայլ: Այդ նպատակով ԱՄՆ-ը կշարունակի նպաստել երկու կողմերի բանակցություններին՝ Էր Ռիադում ձեռք բերված պայմանավորվածություններին համապատասխան խաղաղ կարգավորման հասնելու համար:
Թարգմանությունը՝ Էմմա Չոբանյանի
