Ստամբուլի բանտերում տեղ չի մնացել. Թուրքիայի ընդդիմադիր կուսակցության ղեկավար․ ՏԵՍԱՆՅՈՒԹ

Ստամբուլում հարյուր հազարավոր մարդիկ, բողոքելով քաղաքապետ, ընդդիմադիր Ժողովրդահանրապետական ​​կուսակցությունից (CHP) երկրի նախագահի թեկնածու Էքրեմ Իմամօղլուի ձերբակալության դեմ, յոթերորդ օրն է՝ հավաքվել են Սարաչհանեի հրապարակում։ Իշխանության գործողություններին քաղաքացիներն արձագանքել են հանրահավաքի ժամանակ հնչեցրած «Իրավունք, իրավունք, արդարություն», «Էրդողա՛ն, հրաժարական», «Կառավարությո՛ւն, հրաժարական» կարգախոսներով։

CHP-ի նախագահ Օզգյուր Օզելը իր ելույթում ասել է, որ յոթերորդ օրը Սարաչհանեի համար վերջին օրը կլինի։

«Վաղը երեկոյան Զորության գիշեր է։ Այստեղ իֆթարներ են անցկացվելու, մենք կլինենք նախագահ Էքրեմի և նախագահ Մուրադ Չալըքի մոր ու հոր հետ»,- ասել է նա՝ միաժամանակ ընդգծելով, որ բողոքի ցույցերը շարունակվելու են։

Դիմելով հանրությանը՝ Օզելը հայտարարել է շաբաթ օրը Մալթեփեում մեծ հանրահավաք անցկացնելու որոշման մասին՝ «խոսելու յուրաքանչյուր ձերբակալության դեմ, պահանջելու բաց դատավարություններ և արտահերթ ընտրություններ»։

«Էրդողան, եթե այդքան համարձակություն ունես, TRT-ով հեռարձակիր դատախազի հարցերն ու նախագահ Էքրեմ  Իմամօղլուի պատասխանները նրա դեմ հարուցված դավադրության գործի լսումների ժամանակ։ Մենք բավականաչափ քաջություն ունենք, իսկ դո՞ւ։ Ոչ մի ապացույց, ոչ մի վկա և ոչ մի կոնկրետ ապացույց չի ներկայացվել»,- հայտարարել է CHP-ի ղեկավարը։

Նա նաև կոչ է արել ոստիկանությանը բռնություն չկիրառել երիտասարդների նկատմամբ, միաժամանակ, նշել, որ ձերբակալվել է 11 լրագրող, որից 8-ը կալանավորվել է։

«Մեր կալանավորված լրագրող ընկերներին դատարանի շենքից հետ տարան Վաթան, ոչ թե բանտ, քանի որ Ստամբուլի բանտերում նրանք տեղ չունեն։ Վաղը նախատեսվում են տեղափոխություններ դեպի հարևան նահանգներ։ Պատկերացրեք մի կառավարություն 2025-ին, որն ուսանողներին, լրագրողներին և ժողովրդավարություն ցանկացողներին նետել է աշխարհի ամենահայտնի մեգապոլիսի բանտերը՝ դրանցում տեղ չթողնելով։ Ամո՛թ նման ռեժիմին»,- հայտարարել է ընդդիմադիր կուսակցության ղեկավարը։

Բողոքի հանրահավաքներն ու երթերը շարունակվում են նաև Անկարայում, Իզմիրում, Բուրսայում, Ադանայում, Անթալիայում, Ռիզեում, Մերսինում և Թուրքիայի այլ քաղաքներում։ Ոստիկանները կրկին տարբեր քաղաքներում ցուցարարների նկատմամբ բռնություն են կիրառել՝ արցունքաբեր գազի, ռետինե փամփուշտների և ջրցան մեքենաների օգտագործմամբ։

Թարգմանությունը՝ Էմմա Չոբանյանի