Քաղաքականություն
25.03.2025 | 20:29
Ստամբուլի ընդդիմադիր քաղաքապետ Էքրեմ Իմամօղլուի և քաղաքապետարանի այլ աշխատակիցների դեմ իրականացվող գործողությունների և ձերբակալությունների դեմ նախօրեին քաղաքի Սարաչհանե հրապարակում շարունակվող բողոքի ցույցերից հետո Թուրքիայի նախագահ Ռեջեփ Թայիփ Էրդողանին ու նրա ընտանիքի անդամներին «վիրավորելու» համար 41 մարդ է ձերբակալվել, գրում է Cumhuriyet-ը։
Հայտնի է դարձել, որ դատախազությունը հիշյալ անձանց մեղադրում է «նախագահին վիրավորելու», «Հավաքների և ցույցերի մասին» օրենքը խախտելու, «ծառայողական պարտականությունները կատարողին դիմադրելու» համար։ Նրանց գործով հետաքննությունը շարունակվում է։
Հավելենք, որ ընդդիմադիր Ժողովրդահանրապետական կուսակցության նախագահ Օզգյուր Օզելը, ինչպես նաև ձերբակալված Էքրեմ Իմամօղլուն դատապարտել են Էրդողանի մոր հասցեին հնչած վիրավորանքները։
«Իհարկե, մենք պայքարելու ենք մարտի 19-ի հեղաշրջման դեմ՝ օգտագործելով բոլոր օրինական միջոցները։ Այնուամենայնիվ, նույնիսկ այս հեղաշրջման համար ես չեմ կարող ընդունել այն վիրավորանքները, որոնք հասցվել են մեր մայրերին։ Ամբողջ սրտով դատապարտում եմ նախագահի մոր հասցեին հնչած վիրավորանքները։ Կոչ եմ անում նաև դատախազությանը միջոցներ ձեռնարկել նրանց դեմ, որոնք օգտվել են մեր՝ բանտում լինելուց և անբարոյական հաղորդագրություններ են տեղադրել՝ ուղղված մորս, կնոջս և ընտանիքիս»,- գրել է Իմամօղլուն սոցցանցի իր էջում։
Թարգմանությունը՝ Էմմա Չոբանյանի
