Թուրքիայում ոստիկանները դարձյալ բռնություն և հատուկ միջոցներ են կիրառել ցուցարարների նկատմամբ․ ՏԵՍԱՆՅՈՒԹ

Թուրքիայում մարտի 19-ին Ստամբուլի ընդդիմադիր քաղաքապետ Էքրեմ Իմամօղլուի և քաղաքապետարանի բազմաթիվ աշխատակիցների ձերբակալությունից հետո սկսված բողոքի ցույցերը շարունակվում են։ Ցույցերի 6-րդ օրը Ստամբուլի Սարաչհանե հրապարակում, որտեղ քաղաքապետարանն է, կրկին հարյուր հազարավոր մարդիկ են հավաքվել։ Թուրքական գլխավոր ընդդիմադիր Ժողովրդահանրապետական կուսակցության (CHP) նախագահ Օզգյուր Օզելը հանրահավաքում ելույթ է ունեցել։ Յուրաքանչյուր անգամ երկրի նախագահ Ռեջեփ Թայիփ Էրդողանի անունը հիշատակելիս հավաքվածները վանկարկել են՝ «Թայի՛փ, հրաժարական տուր»։

«Սա հրապարակային հանդիպում չէ, սա ֆաշիզմին հակադրվելու ակտ է։ Ստամբուլը կորցնողը կորցնում է Թուրքիան, ով հաղթում է Ստամբուլում, նա հաղթում է Թուրքիայում։ Էրդողան՝ ի՞նչ էիր ասում, ասում էիր՝ դա տեղի է ունենում առաջին օրը, իսկ երրորդ օրը մոռացվում է: Անցել է մեկ շաբաթ և ի՞նչ են ասում երիտասարդները։ Ասում են՝ սա դեռ սկիզբն է, շարունակեք պայքարը»,- հայտարարել է Օզելը։

Նա ասել է, որ Իմամօղլուն պետք է ազատվի կալանքից, նաև կոչ արել նրա գործով դատավարությունն ուղիղ հեռարձակել TRT հեռուստաալիքով։

«Պարո՛ն Թայիփ, իմ քաղաքապետը պատրաստ է դատարանի ուղիղ եթերում պատասխանել ձեր հարցերին, խայտառակել ձեզ, ձեր դատախազի ստերը, հարցաքննվել ձեզ ամբողջ ժողովրդի աչքի առաջ։ Ձեր դատախազը պատրա՞ստ է ներկայանալ մեր առջև։ Ես առաջարկում եմ, որ Իմամօղլուի դատավարությունը ուղիղ եթերով հեռարձակվի հեռուստատեսությամբ, իսկ պատասխանները մեկ առ մեկ տրվեն ապացույցներով»,- հայտարարել է ընդդիմադիր կուսակցության ղեկավարը։

Հավելենք, որ բողոքի հանրահավաքներ ու երթեր են տեղի ունեցել նաև Անկարայում, Իզմիրում, Բուրսայում, Ադանայում և Թուրքիայի այլ քաղաքներում։ Թուրքական լրատվամիջոցները կադրեր են տարածում, թե ինչպես են ոստիկանները տարբեր քաղաքներում ցուցարարներին փորձում ցրել արցունքաբեր գազի, ռետինե փամփուշտների և ջրցան մեքենաների կիրառմամբ։

Ստամբուլում էլ ոստիկանները արցունքաբեր գազով և ռետինե  մահակներով բռնություն են գործադրել ցուցարարների նկատմամբ։

Թարգմանությունը՝ Էմմա Չոբանյանի