Թուրքիայի իշխանությունները կոռուպցիոն հետաքննություն են սկսել նաև Անկարայի քաղաքապետարանի նկատմամբ

Անկարայի քաղաքապետարանի կողմից կազմակերպված 33 հրապարակային համերգների վերաբերյալ հետաքննություն է սկսվել հանրային ֆինանսական կորուստների մեղադրանքներով։ Անկարայի գլխավոր դատախազությունը հետաքննություն է սկսել 2024 թվականի նոյեմբերին համերգների մասին հաղորդումներ ստանալուց հետո, գրում է Birgun-ը։

Անկարայի քաղաքապետ Մանսուր Յավաշը, որ գլխավոր ընդդիմադիր Ժողովրդահանրապետական կուսակցության անդամ է, համերգների հետ կապված շարունակվող հետաքննությունից հետո ժամանակավոր պաշտոնանկ է արել քաղաքի մշակույթի և սոցիալական հարցերի վարչության երկու բարձրաստիճան պաշտոնյաների:

«2021-ից 2024 թվականներին անցկացված մի շարք մշակութային և գեղարվեստական ​​իրադարձություններ որոշ ժամանակ ստուգվում էին աուդիտորների կողմից: Այժմ ավարտվել է 130 համերգ ընդգրկող ծառայությունների գնումների հետաքննությունը: Որոշում է կայացվել թույլատրել հետաքննություն 33 համերգների վերաբերյալ ենթադրյալ հանրային ֆինանսական կորուստների վերաբերյալ»,- ասվում է հայտարարության մեջ։

Նշվում է, որ ստուգման արդյունքում 97 համերգներում ոչ մի խախտում չի հայտնաբերվել, այդ իրադարձությունների առնչությամբ որևէ հետաքննություն չի արտոնվել: Այնուամենայնիվ, 33 համերգի համար հետաքննություն է հաստատվել՝ կապված հանրային ֆինանսական կորուստների մեղադրանքների հետ:

Հաղորդվում է, որ հետաքննության տակ գտնվող քաղաքապետարանի ինը աշխատակիցները նախատեսում են որոշումը բողոքարկել շրջանային վարչական դատարանում։

Թարգմանությունը՝ Էմմա Չոբանյանի