Թուրքիայում ոստիկանները ջրցաններով փորձել են ցրել զանգվածային ցույցերը․ ընդդիմությունն Էրդողանին ընտրությունների կոչ է անում` առաջադրելով Իմամօղլուի թեկնածությունը. ՏԵՍԱՆՅՈՒԹ

Թուրքիայում տարբեր քաղաքներում նախօրեին շարունակվել են Ստամբուլի ընդդիմադիր քաղաքապետ Էքրեմ Իմամօղլուի կալանավորման  դեմ բողոքի ակցիաներն ու հանրահավաքները։ Ստամբուլի Սարաչհանե հրապարակում, որտեղ գտնվում է քաղաքապետարանը, Թուրքիայի գլխավոր ընդդիմադիր Ժողովրդահանրապետական կուսակցության (CHP) հրավիրած հանրահավաքին, ըստ տարբեր տարբեր տվյալների, շուրջ մեկ միլիոն մարդ է մասնակցել։

Հանրահավաքում ելույթ են ունեցել Էքրեմ Իմամօղլուի կինը՝ Դիլեք Իմամօղլուն, ինչպես նաև Ժողովրդահանրապետական կուսակցության Օզգյուր Օզելը։ Վերջինն Իմամօղլուի կալանավորումըը բնութագրել է որպես «մարտի 19-ի անհաջող հեղաշրջման փորձ»։ Օզելը քննադատել է Թուրքիայի «հիմնական լրատվամիջոցներին»՝ Սարաչհանեի և երկրում բողոքի ցույցերի, ինչպես նաև կուսակցությունում երկրի նախագահի նախնական ընտրությունների մասին չհաղորդելու համար։

Խոսելով նախօրեին CHP-ում անցկացված փրայմերիզի մասին, որին առաջադրվել էր միայն Էքրեմ Իմամօղլուն, Օզելն ասել է․ «Չնայած 2621 քվեատուփ դեռևս չի հաշվվել, համերաշխության քվեատուփերում տրված ձայների ընդհանուր թիվը կազմում է 13 միլիոն 211 հազար»:

Նա հայտարարել է, որ մասնակիցների ընդհանուր թիվը, ներառյալ՝ կուսակցության անդամները, մոտենում է 15 միլիոնին։

«Այս հրապարակը մարտահրավեր է Էրդողանին։ Սա անխուսափելի է դարձնում արտահերթ ընտրությունները»,- հավելել է նա։

Օզելը նաև հայտարարել է, որ բողոքի ցույցերը շարունակվելու են։

«Վաղվանից մենք բոլորս կսկսենք պաշտպանել ապագան այն հրապարակներում և տարածքներում, որոնց մասին կհայտարարվի։ Մենք կանգ չենք առնելու, քանի դեռ չենք գտել նախագահ Էքրեմին: Մենք կանգ չենք առնելու, քանի դեռ նրան նախագահ չենք դարձրել։ Թող մեր ճանապարհը պարզ լինի, ձեր ճանապարհը պարզ լինի։ Շնորհակալություն այս տարածքում գտնվող 1 միլիոն մարդկանց»,- նշել է նա։

Հավաքից հետո Ժողովրդահանրապետական ​​կուսակցությունը (CHP) հայտնել է, որ որոշել է իր նախագահի թեկնածուին մարտի 23-ին կայացած նախնական ընտրություններում։ Նշվում է, որ 1 միլիոն 753 հազար CHP-ականներից ընտրության է գնացել և քվեարկել 1 միլիոն 653 հազարը։

Բացի այդ, «Համերաշխության քվեատուփերից», որտեղ քվեարկել են անկուսակցական քաղաքացիները, ստացվել է 13 մլն 211 հազար ձայն։ Այս կերպ նախնական ընտրություններին, ընդհանուր առմամբ, քվեարկել է 14 մլն մլն 864 հազար մարդ։ Այսպիսով, CHP-ի կողմից պատմության մեջ առաջին անգամ անցկացրած նախնական ընտրություններում Էքրեմ Իմամօղլուն պաշտոնապես հաստատվել է որպես նախագահի թեկնածու՝ մեծ աջակցություն ստանալով։

Հավելենք, որ բողոքի բազահազարանոց հանրահավաքներ ու երթեր են տեղի ունեցել Անկարայում, Իզմիրում, Էսքիշեհիրում, Անթալիայում, Մերսինում, Բուրսայում, Ադանայում և Թուրքիայի այլ քաղաքներում։ Թուրքական լրատվամիջոցները կադրեր են տարածում, թե ինչպես են ոստիկանները տարբեր քաղաքներում ցուցարարներին փորձում ցրել արցունքաբեր գազի և ջրցան մեքենաների կիրառմամբ։

Նշենք, որ Թուրքիայի իշխանությունները կիրակի ժամանակավորապես դադարեցրել են Էքրեմ Իմամօղլուի՝ քաղաքապետի պարտականությունները այն բանից հետո, երբ Ստամբուլի դատարանը պաշտոնապես կալանավորել է նրան նույն օրը վաղ առավոտյան՝ մինչև կոռուպցիայի մեղադրանքով նրա դատավարության արդյունքները։

Ներքին գործերի նախարարությունը հայտարարել է, որ Իմամօղլուի և Ստամբուլի ևս երկու շրջանների ղեկավարների՝ Բելիքդուզու քաղաքապետ Մահմեթ Մուրադ Չալիքի և Շիշլիի քաղաքապետ Ռեսուլ Էմրահ Սահանի պարտականությունները նույնպես ժամանակավորապես դադարեցվել են։

Թարգանությունը՝ Էմմա Չոբանյանի