Քաղաքականություն
12.03.2025 | 12:34
Ամերիկացի քրիստոնյա առաջնորդների կոալիցիան նամակ է հղել ԱՄՆ նախագահ Դոնալդ Թրամփին՝ կոչ անելով վճռական քայլեր ձեռնարկել ադրբեջանական իշխանությունների կողմից պահվող 24 քրիստոնյա պատանդների՝ 23 հայ քրիստոնյաների և մեկ կրոնափոխ ադրբեջանցի քրիստոնյայի ազատ արձակման համար։ Նրանց թվում է Ռուբեն Վարդանյանը, որը շարունակում է մնալ ծայրահեղ ծանր վիճակում, քանի որ նրա հացադուլի 22-րդ օրն է, ինչի հետևանքով նրա առողջական վիճակը կտրուկ վատացել է ադրբեջանական կալանքի տակ։
Կոչը ստորագրողները վկայակոչում են խոշտանգումների և շարունակվող չարաշահումների մասին հավաստի հաղորդումները՝ ընդգծելով իրենց համոզմունքը, որ նախագահ Թրամփի ղեկավարությունը եզակի է այս ճգնաժամը լուծելու համար, և որ անհրաժեշտ է արագ գործողություններ՝ փրկելու քրիստոնյաների կյանքը։
«Մենք հավատում ենք, որ դուք միակն եք, որը կարող է փրկել այս քրիստոնյա պատանդներին: Գրեթե երկու տարի առաջ Ադրբեջանն էթնիկ զտումներ է իրականացրել ավելի քան 120,000 քրիստոնյա հայերի իրենց նախնիների տներից, մինչդեռ Բայդենի վարչակազմը հրաժարվել է քայլեր ձեռնարկել: Այդ ժամանակից ի վեր 23 քրիստոնյա հայ պատանդներ և մեկ կրոնափոխ ադրբեջանցի ենթարկվել են խոշտանգումների: Կարմիր Խաչի միջազգային կոմիտեին՝ միակ կազմակերպությանը, որին թույլատրվել է ստուգել նրանց բարեկեցությունը, վերջին օրերին հրամայվել է լքել երկիրը»,- է նամակում։
Քրիստոնյա առաջնորդները նաև բարձր են գնահատում նախագահ Թրամփի նախկին աջակցությունը Հայաստանին և հալածված քրիստոնյաներին՝ նշելով. «Շնորհակալություն քարոզարշավի ընթացքում Հայաստանին և հալածված քրիստոնյաներին ցուցաբերած աջակցության համար։ Ձեր հայտարարությունն ուժեղ էր և հստակ ուղերձ հղեց նրանց, որոնք ցանկանում են խաթարել Հայաստանի անվտանգությունը և նրա հարուստ քրիստոնեական ժառանգությունը՝ որպես Քրիստոսի Ավետարանն ընդունած առաջին երկիր աշխարհի պատմության մեջ»:
Նրանք նաև վկայակոչել են Թրամփի նախկին գրառումն այն մասին, որ Քամալա Հարիսը ոչինչ չի արել, երբ 120.000 հայ քրիստոնյաներ սարսափելի հալածանքների են ենթարկվել և բռնի տեղահանվել Արցախից։
Թարգմանությունը՝ Էմմա Չոբանյանի
