13.03.2026 | 15:48
Քաղաքապետարանը խորհուրդ էր տվել վարձակալել, թաղապետարանը մերժել է. բնակիչ․ ՏԵՍԱՆՅՈՒԹ
Նավթի գների աճը Ռուսաստանին օրական 150 միլիոն դոլար է բերում. FT
Քաղաքականություն
13.03.2026 | 14:36
ԱՄՆ-ի և Իսրայելի կողմից Իրանի դեմ պատերազմի ֆոնին նավթի համաշխարհային գների կտրուկ աճը Ռուսաստանի բյուջեին օրական մոտ 150 միլիոն դոլար լրացուցիչ եկամուտ է ապահովում։ Այս մասին հաղորդում է Financial Times-ը՝ հղում անելով ոլորտի վերլուծաբանների գնահատականներին, գրում է Meduza-ն։
Մասնագետների գնահատմամբ՝ մարտի վերջին Ռուսաստանի կառավարությունը կարող է ստանալ, ընդհանուր առմամբ, 3,3-4,9 միլիարդ դոլար լրացուցիչ եկամուտ, եթե ռուսական նավթի միջին գինը հասնի մեկ բարելի համար 70-80 դոլարի։ Փետրվարին ռուսական նավթի միջին գինը կազմել է մոտ 45 դոլար մեկ բարելի համար։
Ըստ Kpler ընկերության առաջատար վերլուծաբան Սումիտ Ռիտոլիայի՝ Մերձավոր Արևելքում նոր պատերազմի «գլխավոր հաղթողը» կլինի Ռուսաստանը։
«Եվ սա պատմության մեջ ամենամեծ էներգետիկ ճգնաժամի միայն սկիզբն է»,- գրել է Ռուսաստանի նախագահի հատուկ ներկայացուցիչ Կիրիլ Դմիտրիևը X սոցիալական ցանցում՝ մեկնաբանելով FT-ի հրապարակումը։
Հոդվածի հրապարակումից հետո ԱՄՆ իշխանությունները հայտարարել են, որ ռուսական նավթի դեմ պատժամիջոցները ժամանակավորապես մեղմացվել են՝ թույլ տալով շարունակել հում նավթի և նավթամթերքի առաքումները, եթե դրանք նավերի վրա բեռնվել են մինչև մարտի 12-ը։
The Bell-ը, հղում անելով Kpler-ի տվյալներին, հաղորդում է, որ մարտի 6-ի դրությամբ՝ լցանավերում եղել է մոտավորապես 130 միլիոն բարել ռուսական նավթ, որի զգալի մասի մատակարարումը հետաձգվել էր պատժամիջոցների պատճառով։
Թարգմանությունը՝ Էմմա Չոբանյանի
