Ուկրաինայի հետ օգտակար հանածոների շուրջ գործարքն անվտանգության երաշխիքներ չի պարունակում

Ուկրաինայի և Միացյալ Նահանգների միջև գործարքը, որը ներառում է «ռազմավարական օգտակար հանածոներ, էներգետիկա և պետական ձեռնարկություններ», Կիևին կտրամադրի «տնտեսական անվտանգության երաշխիքներ», Fox News-ին տված հարցազրույցում ասել է ԱՄՆ ֆինանսների նախարար Սքոթ Բեսենթը, փոխանցում է DW-ի ռուսական ծառայությունը:

«Այս գործարքը Ուկրաինայի և Ռուսաստանի միջև խաղաղության հասնելու՝ նախագահ Թրամփի ռազմավարության մի մասն է, և թույլ է տալիս ուկրաինացիներին վերադառնալ խաղաղ գոյության»,- ասել է Բեսենթը:

Նա, միաժամանակ, ընդգծել է, որ գործարքը չի ներառում ԱՄՆ-ի կողմից Ուկրաինային ուղիղ ռազմական երաշխիքներ, սակայն պարունակում է «չբարձրաձայնված երաշխիք», որ Միացյալ Նահանգները «զգալի ռեսուրսներ կներդնի երկրի տնտեսական ապագայում»՝ դրանով իսկ ապահովելով «տնտեսական անվտանգության երաշխիք»:

«Որքան շատ ակտիվներ ունենան ամերիկյան ընկերությունները տեղական մակարդակում, այնքան ԱՄՆ-ը շահագրգռված կլինի, որ ուկրաինական տնտեսությունը լավ զարգանա, այնքան ավելի շատ անվտանգություն է դա ստեղծում ուկրաինացի ժողովրդի համար և ավելի բարձր շահութաբերություն՝ ամերիկացի հարկատուների համար»,- պարզաբանել է նախարարը։

Փետրվարի 22-ին Bloomberg-ը, հղում անելով իր աղբյուրներին, հայտնել էր, որ Ուկրաինան մերժել է 500 միլիարդ դոլար արժողությամբ հիմնադրամ ստեղծելու՝ ԱՄՆ-ի պահանջը, որը կկազմի Վաշինգտոնի՝ երկրի որոշ ռեսուրսների հասանելիության գործարքի մաս: Ենթադրվում է, որ հիմնադրամը պետք է փոխհատուցի ԱՄՆ-ին ռուսական ներխուժումից հետո Կիևին տրամադրված օգնության համար։

Ուկրաինական կողմը, սակայն, պնդում է, որ ամերիկյան օգնության իրական ծավալը կազմել է ավելի քան 90 միլիարդ դոլար, ինչը մոտավորապես հինգ անգամ պակաս է Դոնալդ Թրամփի վարչակազմի պահանջած գումարից։

Թարգմանությունը՝ Տաթև Ֆռանգյանի