10.08.2026 | 10:03
4 խաղափուլից հետո երեք հայ շախմատիստ առաջատարների շարքում է. Եվրոպայի Մ20 առաջնություն
Պենտագոնի ղեկավարը հայտարարել է, որ վերադարձը Ուկրաինայի 2014 թվականի սահմաններին «անիրատեսական է»
Քաղաքականություն
12.02.2025 | 20:57
Պենտագոնի ղեկավար Փիթ Հեգսեթը հայտարարել է, որ «իրատեսական չէ» ակնկալել, որ Ուկրաինան կվերադառնա 2014 թվականի իր սահմաններին, երբ Ռուսաստանն իր վերահսկողության տակ վերցրեց Ղրիմը, գրում է BBC-ն։
Ելույթ ունենալով Բրյուսելում Ուկրաինայի պաշտպանության կոնտակտային խմբի հանդիպման ժամանակ՝ Հեգսեթն ասել է, որ «տևական խաղաղություն» հնարավոր կլինի հաստատել միայն «ռազմի դաշտի իրատեսական գնահատմամբ»: ԱՄՆ պաշտպանության նախարարը նաև նսեմացրել է ՆԱՏՕ-ին Ուկրաինային անդամակցելու հնարավորության առաջարկները և բացառել ամերիկյան զորքերի տեղակայումն Ուկրաինայում՝ որպես ապագա անվտանգության համաձայնագրի մաս:
Կիևը բազմիցս ՆԱՏՕ-ին անդամակցության կոչ է արել և նախկինում մերժել տարածքների հանձնումը խաղաղ համաձայնագրի շրջանակներում:
«Մենք, ինչպես դուք, ցանկանում ենք ինքնիշխան և բարգավաճ Ուկրաինա: Սակայն մենք պետք է սկսենք նրանից, որ 2014 թվականից առաջ գոյություն ունեցող Ուկրաինայի սահմաններին վերադառնալն անիրատեսական նպատակ է: Այդ պատրանքային նպատակը հետապնդելը միայն կերկարաձգի պատերազմը և ավելի շատ տառապանքներ կբերի»,- ասել է ԱՄՆ պաշտպանական գերատեսչության ղեկավարը՝ հավելելով, որ անկացած կայուն խաղաղություն պետք է ներառի «անվտանգության ամուր երաշխիքներ՝ ապահովելու, որ պատերազմը նորից չի սկսվի»:
Նա ասել է, որ «ԱՄՆ-ը չի հավատում, որ ՆԱՏՕ-ին Ուկրաինայի անդամակցությունը բանակցային կարգավորման իրատեսական արդյունք է»: Փոխարենը, անվտանգության երաշխիքները պետք է ապահովեն «կարող եվրոպական և ոչ եվրոպական զորքերը»:
«Եթե այդ զորքերը որևէ պահի որպես խաղաղապահներ տեղակայվեն Ուկրաինայում, ապա դրանք պետք է տեղակայվեն որպես ՆԱՏՕ-ի անդամ չհանդիսացող առաքելություն և չպետք է ենթարկվեն 5-րդ հոդվածին»,- ասել է Պենտագոնի ղեկավարը՝ նկատի ունենալով դաշինքի փոխադարձ պաշտպանության դրույթը։
Թարգմանությունը՝ Էմմա Չոբանյանի
