Հարավային Լիբանանից իսրայելական զորքերի դուրսբերման գործընթացը ձգձգվում է

Իսրայելի զորքերի Հարավային Լիբանանից դուրսբերման վերջնաժամկետը լրացավ կիրակի վաղ առավոտյան, սակայն որոշ շրջաններում նրանք դեռ կմնան։ Իսրայելը պատճառաբանում է, որ Հեզբոլլահի հետ զինադադարի համաձայնագիրը դեռ ամբողջությամբ չի իրականացվել․ գրում է BBC-ն։

Այս իրավիճակը կապված է 60-օրյա համաձայնագրի հետ, որը կնքվել էր ԱՄՆ-ի և Ֆրանսիայի միջնորդությամբ՝ վերջ դնելով 14-ամսյա հակամարտություններին։ Համաձայնագիրը նախատեսում էր իսրայելական զորքերի դուրսբերում հարավային Լիբանանից, ինչպես նաև Հեզբոլլահի գրոհայինների և զինամթերքի հեռացում այդ տարածքից։

Միևնույն ժամանակ, հազարավոր լիբանանցի զինվորներ կտեղակայվեն այն տարածքում, որտեղ տասնամյակներ շարունակ Հեզբոլլահը գերիշխող ուժ է եղել:

Լիբանանի առողջապահության նախարարության տվյալներով՝ կիրակի օրը սահմանամերձ Հուլա գյուղում իսրայելական կրակոցներից մեկ մարդ զոհվել է, ինը՝ վիրավորվել։ Մոտակա Քֆար Կիլա գյուղում ևս ութ մարդ վիրավորվել է, երբ բնակիչները փորձել են վերադառնալ իրենց տները։

Այս իրավիճակը դառնում է Լիբանանի նոր նախագահ Ժոզեֆ Աունի առաջին խոշոր մարտահրավերը։ Նա, որպես բանակի ղեկաբար, ձգտում է կայունություն հաստատել երկրում։ Նրա գրասենյակը հայտարարել է, որ հարավային Լիբանանում ստեղծված լարված իրավիճակի լուծման համար «ինտենսիվ շփումներն ու խորհրդակցությունները» շարունակվում են։

Հեզբոլլահի արձագանքը դեռևս անհայտ է, սակայն հնարավոր է, որ ռազմական գործողությունների վերսկսումը հանդիպի ուժեղ դիմադրության։

Հակամարտության վերջին սրացումն սկսվեց անցյալ սեպտեմբերին՝ իսրայելական օդուժի լայնամասշտաբ գործողություններով, Հեզբոլլահի ղեկավարների սպանությամբ և հարավային Լիբանան ցամաքային ներխուժմամբ։ Հարձակման հետևանքով սպանվել է շուրջ 4000 մարդ, այդ թվում՝ բազմաթիվ խաղաղ բնակիչներ, և ավելի քան 1,2 միլիոն մարդ տեղահանվել է։