Ալեքսանդր Սիրունյանին առնչվող հանցագործության մասին հաղորդում ստանալու տեղեկությունը դատախազությունը ոչ հերքում է, ոչ հաստատում

Factor.am-ի տեղեկություններով՝ ՔՊ-ական, ԲԴԽ անդամի նախկին թեկնածու Ալեքսանդր Սիրունյանի գործունեության հետ կապված ՀՀ գլխավոր դատախազություն հանցագործության մասին հաղորդում է ներկայացվել։

Factor.am-ը գրավոր հարցմամբ դիմել էր Գլխավոր դատախազությանը՝ պարզելու, թե ինչ մեղադրանքի մասին է խոսքը, ո՞ւմ կողմից է ներկայացվել և արդյոք դատախազությունը դիմել է նախաքննական մարմնին քրեական վարույթ հարուցելու համար։

Աննա Վարդապետյանի ղեկավարած կառույցից փոխանցված պատասխանում հանցագործության մասին հաղորդում ստանալու և նախաքննական մարմնին դիմելու վերաբերյալ տեղեկությունները ո՛չ հերքել են, ո՛չ հաստատել։ Իրավապահ կառույցը հղում է արել Տեղեկատվության ազատության մասին ՀՀ օրենքի 8-րդ հոդվածի 1-ին մասին։

Այս հոդվածը սահմանում է՝ տեղեկատվություն տնօրինողը, մերժում է տեղեկության տրամադրումը, եթե դա՝
1) պարունակում է պետական, ծառայողական, բանկային, առևտրային գաղտնիք.
2) խախտում է մարդու անձնական և ընտանեկան կյանքի գաղտնիությունը, այդ թվում՝ նամակագրության, հեռախոսային խոսակցությունների, փոստային, հեռագրական և այլ հաղորդումների գաղտնիությունը.
3) պարունակում է հրապարակման ոչ ենթակա նախնական քննության տվյալները.
4) բացահայտում է մասնագիտական գործունեությամբ պայմանավորված մատչելիության սահմանափակում պահանջող տվյալներ (բժշկական, նոտարական, փաստաբանական գաղտնիք).
5) խախտում է հեղինակային իրավունքը և (կամ) հարակից իրավունքները։

Գլխավոր դատախազության պատասխանից կարող ենք ենթադրել, որ ինչ-որ գործընթաց արդեն իսկ առկա է, այլապես՝ ինչու պետք է իրավապահ կառույցը բացասական պատասխանի դեպքում հղում աներ անձնական գաղտնիք պարունակող տեղեկություն չտրամադրելուն։

Ուշագրավ է նաև այն, որ գլխավոր դատախազությունը Factor.am-ի մեկ այլ հարցի հստակ պատասխան է տվել՝ չի ուսումնասիրում Սիրունյանի՝ ԱԺ-ում արված աղմկահարույց հայտարարությունները։

Հիշեցնենք՝ Սիրունյանը ԲԴԽ անդամի թեկնածուի կարգավիճակում անդրադարձել էր իր ձեռք բերած հողամասին և զենքի բիզնեսում ներգրավված լինելուն։

Սիրունյանը ԱԺ-ում չէր հերքել, որ Ծաղկաձոր համայնքում 2 հազար քմ տարածք է ձեռք բերել ընդամենը 300 հազար դրամով։ Պնդել էր, թե հողն ընկերոջից է նվեր ստացել, իսկ գործարքը եղել է «ֆիկտիվ»:

Նա նաեւ առնչություն է ունեցել բանակին փամփուշտ մատակարարող ընկերության հետ։ Այս առնչությամբ Սիրունյանն ԱԺ ամբիոնից հայտարարել էր․

«Հիմնադիրը նոմինալ եղել է ինձ շատ հարազատ մարդ, դուռ դռի հարևան, շատ հարազատ ենք մինչև էսօր, Պաշտպանության նախարարության վարչության պետ, Արթուր Գալստյանը՝ տոպոգրաֆիայի: Նոմինալ ինքն ա եղել, ընկերությունը ռուսական ա: Մի օր ինձ ասեց՝ «լսի, մեր ասոբիստները միշտ դրա մեջ խնդիր են տեսնում, որ իմ անունով ա, հարազատ մարդ ա ինձ պետք՝ անենք իրա անունով»: Ասի՝ «արա»: Ինձ ո՞վ թույլ կտա՝ ես զբաղվեմ պատրոնի վաճառքով»:

Factor.am-ը թեմայի վերաբերյալ մեկնաբանություն խնդրեց Ալեքսանդր Սիրունյանից` արդյոք իր հետ առնչվող հաղորդում ներկայացվել է դատախազություն, նա նշեց, որ տեղեկություններ չունի։

Հիշեցնենք՝ հունվարի 20-ին, ԱԺ-ն Սիրունյանի թեկնածությունը քննարկեց ԲԴԽ անդամի թեկնածուի պաշտոնում։ Երեկ նախատեսված էր ընտրությունը, սակայն, այն տեղի չունեցավ։ Ալեքսանդր Սիրունյանը հայտարարեց, որ իր ընտրությունը կարող է հարվածել, թե դատական իշխանության, թե կուսակցության հեղինակությանը։

«Նախորդ օրերից սկսած եղան քննարկումներ երկու գույքային հարցի շուրջ՝ էդ հողամասի և էն ընկերությունում իմ ներգրավվածության հետ կապված, և ես գտնում եմ, որ էդ չվերացված, չփարատված կասկածների պայմաններում դատավոր նշանակելը կոռեկտ չի, և դա վնասելու է մեր դատարանի հենց իմիջին և դատավորի կարգավիճակին։ Միաժամանակ, էդ ամենով հանդերձ, էդ ամեն ինչը կարող է վնասաբեր լինել նաև մեր կուսակցության իմիջին: Էդ պայմաններում, ես գտնում եմ, որ իմ նշանակումը հնարավոր չէ», – ՔՊ-ին պատկանող լրատվամիջոցին հայտնել էր նա։

Նարեկ Կիրակոսյան