30.04.2026 | 14:02
Զելենսկին արձագանքել է Պուտինի՝ մայիսի 9-ի հրադադարի առաջարկին
2024-ի ամփոփիչ քննարկումը․ պատերազմներ, ներքին լարումներ, բռնություններ․ ի՞նչ սպասել 2025-ին․ ՏԵՍԱՆՅՈՒԹ
Քաղաքականություն
30.12.2024 | 20:30
2024 թվականը բուռն տարի էր՝ լի սրընթաց զարգացումներով թե՛ Հայաստանում, թե՛ աշխարհում։ Ռուսաստանը շարունակեց արյունալի պատերազմը Ուկրաինայի դեմ՝ այդ երկրին պատճառելով հազարավոր մահեր, ավերածություններ։ ԱՄՆ-ում ընտրվեց նոր նախագահ․ ՀՀ-ն և աշխարհը 2025-ին ստիպված կլինեն գործ ունենալ անկանխատեսելիի համբավ ունեցող Դոնալդ Թրամփի հետ։ Մեկ-երկու շաբաթում Սիրիայում ընկավ Ասադների կեսդարյա դինաստիան․ ռուսական պաշտպանության տակ գտնվող Բաշար Ասադը փախավ Մոսկվա։ Հայաստանը գարնան ամիսներից սկսած տևական ժամանակ ապրեց ներքաղաքական սուր առճակատման պայմաններում․ Երևանի կենտրոնում ընդդիմությունը բողոքի ակցիաներ էր իրականացնում ընդդեմ սահմանազատման պրոցեսի։ 30 տարի հայկական վերահսկողության տակ գտնված 4 գյուղ անցավ ադրբեջանական վերահսկողության։ Տեղի ունեցան բախումներ ոստիկանների և ցուցարարների միջև։ Իրավապաշտպան համայնքը շարունակեց ահազանգել մարդու իրավունքների խախտումների մասին։
Տարին դյուրին չէր նաև մեդիադաշտի համար․ լրագրողներն աշխատում էին թեժ կետերում՝ երբեմն ենթարկվելով բռնությունների։
«Եվրաքվե»-ի նախաձեռնողներին հաջողվեց 50,000+ ստորագրություն հավաքել․ արդյունքում ԱԺ-ն 2025-ին կքննարկի ԵՄ-ին անդամակցության հարցն օրենքով ամրագրելու նախագիծը։
2024-ին ևս ՀՀ-ն և Ադրբեջանը չստորագրեցին խաղաղության պայմանագիր՝ թեև համաձայնեցված է 17 կետերից 15-ը։
Առանցքային էին նաև 8 բարձրաստիճան պաշտոնյաների հեռացումները։
Ընդհանուր առմամբ, ինչպիսի՞ն էր 2024-ը, ի՞նչ սպասել 2025-ին։
Factor TV-ի տաղավարում հրավիրել ենք քննարկում, որին մասնակցում են Ժաննա Ալեքսանյանը՝ «Լրագրողներ հանուն մարդու իրավունքների» ՀԿ ղեկավար, իրավապաշտպան, Գարեգին Միսկարյանը՝ «Ժողովրդավարական հարթակ» հիմնադրամի տնօրեն, Ռուբեն Բաբայանը՝ ռեժիսոր, Հովհաննես Թումանյանի անվան Տիկնիկային թատրոնի գեղարվեստական ղեկավար, Էդգար Վարդանյանը՝ քաղաքագետ, անկախ հետազոտող, Առնոլդ Բլեյանը՝ Հանուն Հանրապետության կուսակցության ներկայացուցիչ, Աշոտ Մելիքյանը՝ Խոսքի ազատության պաշտպանության կոմիտեի նախագահ։
Մանրամասները՝ տեսանյութում։
