Հայաստանի համար մշակույթը պետք է ամեն ինչից վեր լինի․ ապաքաղաքական զրույց Արայիկ Մանուկյանի հետ․ ՏԵՍԱՆՅՈՒԹ

Factor TV-ի A-politic հաղորդաշարի հյուրն է լրագրող, webtv.am առաջին հայկական մշակութային youtube-յան հեռուստաալիքի և thearmenians.am՝ «Հայեր» մեդիահարթակի հիմնադիր Արայիկ Մանուկյանը: Նա համաձայն է, որ մշակութային բովանդակությունը, ի տարբերություն քաղաքական և քրեական պատմությունների, չի կարող բերել հարյուր հազարավոր հետևորդներ: Միևնույն ժամանակ, հատկապես՝ Հայաստանի համար, մշակույթը պետք է ամեն ինչից վեր լինի, որովհետև դա մեր երկրի մրցակցային առավելությունն է:

Արայիկ Մանուկյանը ծրագրեր է իրականացնում նաև դպրոցականների հետ: Վերջին այսպիսի հանդիպումների շարքը նվիրված էր Երվանդ Քոչարին: Հաղորդման հյուրը նշում է, որ երեխաների մեծ մասը չգիտի, թե ով է Սուսունցի Դավթի և Վարդան Մամիկոնյանի արձանների հեղինակը: Բայց շփումները բացահայտեցին դպրոցականների անկեղծ հետաքրքրությունը և, ամենակարևորը, ծնողների շահագրգռվածությունը:

«Եթե ծնողները չկրթվեն, երեխաներին կրթելն անիմաստ կլինի»,- պնդում է լրագրողը:

«Հայեր» մեդիահարթակի լոգոյի կողքին ասույթներ են տեղադրվում: Դրանցից մեկը Կոստան Զարյանի խոսքն է․ «… Այս ժողովուրդը, որ ապրած է հարյուր հազար Գողգոթաներ հարյուր հազար Յիսուսներու, այս ժողովուրդը ապրած չէ երբեք ներքին, բարոյական Գողգոթա»:

Մեկնաբանելով այս միտքը՝ Արայիկ Մանուկյանը կարծիք է հայտնում, որ մենք՝ հայերս, երբեք բարոյական ինքնաքննությամբ չենք զբաղվել, և դա է մեր խնդիրների հիմնական պատճատը:

Մանրամասները՝ տեսանյութում:

Արամ Աբրահամյան