15.07.2026 | 12:10
ԵՄ-ի արտոնությունը հայկական ապրանքներին // Անկարգություն Փարիզում ԱԱ-ում Ֆրանսիայի պարտությունից հետո․ ԼՈՒՐԵՐ
Վրաստանում ոստիկանությունը բռնի ուժով ցրել է ցուցարարներին․ ձերբակալվել է 43 մարդ
Քաղաքականություն
29.11.2024 | 10:54
Նոյեմբերի 29-ի առավոտյան Թբիլիսիում ոստիկանությունը բռնի ուժով ցրել է ցուցարարներին և մաքրել Ռուսթավելի պողոտան՝ խորհրդարանի շենքի հետևի հատվածում մնացած մասնակիցներին մղելով դեպի Առաջին Հանրապետության հրապարակ, գրում է Paper Kartuli-ն։
Հաղորդվում է, որ ցույցի ցրումն ուղեկցվել է կոշտ ձերբակալություններով ու ոստիկանության կողմից բռնի գործողություններով։ Ականատեսների նկարահանած տեսանյութերից մեկում երևում է, որ հատուկ ջոկատայինները հետապնդել են նաև դեղատանը թաքնված մարդկանց։
Վրաստանի ՆԳՆ-ի տվյալներով՝ ցույցերի ընթացքում 43 մարդ է ձերբակալվել։ Նրանք մեղադրվում են ոստիկանների պահանջներին չենթարկվելու և մանր խուլիգանության համար։ Հետաքննություն է տարվում նաև պետական պաշտոնյային դիմադրություն ցույց տալու և գույքը վնասելու քրեական հոդվածներով (Վրաստանի ՔՕ 353 և 187 հոդվածներ)։
ՆԳՆ-ն նաև նշում է, թե բողոքի ակցիայի ընթացքում ոստիկանության 32 աշխատակից է տուժել։ Որոշնրեը լուրջ վնասվածքներ են ստացել, իսկ 13 տուժածների պարագայում անհրաժեշտ է եղել վիրահատական միջամտություն։
Հիշեցնենք, որ բողոքի ցույցերը Թբիլիսիում սկսվել են այն բանից հետո, երբ Վրաստանի վարչապետ Իրակլի Կոբախիձեն նախօրեին հայտարարեց, որ երկիրը հրաժարվում է ԵՄ անդամակցելու շուրջ բանակցություններից մինչև 2028 թվականի ավարտը։
Թարգմանությունը՝ Էմմա Չոբանյանի
