08.11.2024 | 22:10
Նորաձևություն՝ զոհերի հուշարձանում․ Yerevan Fashion Week-ի ցուցադրության ոչ գլամուր հետևանքները․ ՏԵՍԱՆՅՈՒԹ
5 անշարժ գույք, 4 մեքենա, 62.8 մլն դրամ. առաջին դատավորը, որն անցնում է ապօրինի ծագմամբ գույքի գործով․ ՏԵՍԱՆՅՈՒԹ
Քաղաքականություն
08.11.2024 | 19:45
5 անշարժ գույք, 4 տրանսպորտային միջոց, 1 իրավաբանական անձում մասնակցություն, 62 միլիոն 811 հազար դրամ և 1 բնակելի տան միջին շուկայական արժեքի չափով գումար․ Երևանի ընդհանուր իրավասության դատարանի դատավոր Արտուշ Գաբրիելյանին պատկանող այս ամենի ծագումը և օրինակությունը կասկածի տակ է դնում Ապօրինի ծագում ունեցող գույքի բռնագանձման գործերով վարչությունը՝ հայտարարելով, որ այս ամենը ենթակա է բռնագանձման։ Factor TV-ին հայտնի դարձավ, որ պետականացման ենթակա 5 անշարժ գույքերը ոչ թե առանձնատներ կամ բնակարաններ են, այլ հողամասեր։ Դրանցից 4-ն Արագածոտնի մարզում է, 1-ը՝ Կոտայքում։ Մի շարք աղմկահարույց գործեր քննած դատավորը պնդում է՝ իր գույքն օրինական է։
Արտուշ Գաբրիելյանի խոսքով՝ Ապօրինի ծագում ունեցող գույքի բռնագանձման գործերով վարչության կողմից հայցադիմումը նախորդ երկուշաբթի է ստացել և շտապել դրանց մասով պարզաբանումներ ներկայացնել վարչությանը։
Գաբրիելյանն առաջին դատավորն է, որի գույքի և դրամական միջոցների մի մասի ծագումը կասկածելի է թվացել Գլխավոր դատախազությանը։ Այնինչ, նրա կողմից ներկայացրած հայտարարագիրը, այլ դատավորների համեմատ, բավականին համեստ է։ 2024 թվականի մայիսին ներկայացրած հայտարարագրի համաձայն՝ Գաբրիելյանն անշարժ գույք չունի, ունի 2 ավտոմեքենա, մոտ 16 միլիոն դրամ ավանդ, 221 եվրո, շուրջ 1 միլիոն դրամ և 904 դոլար անկանխիկ միջոցներ, 17 միլիոն դրամ և 55 հազար եվրո կանխիկ գումար։ Դատախազության կողմից բռնագանձման ենթակա համարվող 5 անշարժ գույքերը դատավոր Գաբրիելյանի հայտարարագրում բացակայում են։
Արտուշ Գաբրիելյանը մշտապես եղել է հանրության ուշադրության կենտրոնում, քանի որ քննել է մի շարք աղմկահարույց քրեական գործեր։ Թեև քաղհասարակությունը շատ հաճախ նրան իշխանահաճո դատավոր է որակում, այնուամենայնիվ, Գաբրիելյանը հասցրել է երկու անգամ կանգնել Բարձրագույն դատական խորհրդի առաջ, անգամ խիստ նկատողության արժանացել։ Այնուամենայնիվ, Խորհուրդն այս պահին ձեռնպահ է մնում դատավորի նկատմամբ որևէ գործողություն կատարելուց։
Factor TV-ի գրավոր հարցմանն ի պատասխան՝ Դատական դեպարտամենտի ղեկավարի ժամանակավոր պաշտոնակատար Նաիրի Գալստյանը շեշտել է՝ անկախ Դատախազության հայցադիմումներից՝ յուրաքանչյուր քաղաքացու գույքը համարվում է օրինական, քանի դեռ չկա դատարանի վերջնական վճիռ։
Թե որքանով է տեղին արդարություն իրականացնող դատավորի ունեցվածքի օրինականության հայցը համեմատել շարքային քաղհայցի հետ, պատասխանը ոչ միանշանակ է։ Սակայն մասնագետներն առավել խնդրահարույց են համարում այն, որ Գլխավոր դատախազությունը կասկածի տակ է դնում դատավորի գույքերի օրինականությունը, բայց նրա լիազորությունները, գոնե ժամանակավոր, չեն կասեցվում։
Արդյո՞ք սա է իրական վեթինգը․ դեռևս 5 տարի առաջ վարչապետ Նիկոլ Փաշինյանը հենց այս և մի շարք այլ գործոններ մատնանշելով էր հայտարարում, որ եկել է դատավորների զտման ժամանակը։
Դեռևս 2020 թվականին քաղհասարակությունը հայտարարություն տարածեց՝ պնդումով, որ վեթինգը պետք է սկսել դատավորների գույքերն ուսումնասիրելուց, բարեվարքության գնահատումից և կապերի ստուգումից։ Ուշագրավ է, որ այս հայտարարությանը միացել էր նաև այդ ժամանակ փաստաբան, այժմ ԲԴԽ անդամ Կարեն Թումանյանը, որն այսօր արդեն ոչ միանշանակ է անդրադառնում վեթինգին՝ պատճառաբանելով, որ պաշտոնի հետ կապված կաշկանդվածություն ունի։
Վեթինգը նաև այլ ձևով պետք է դրսևորվի, կարծիք է հայտնում իրավապաշտպան Արթուր Սաքունցը՝ հիշեցնելով մեկ ամիս առաջ Խորհրդի կողմից Գաբրիելյանին խիստ նկատողություն հայտարարելու որոշումը։ Ըստ ԲԴԽ-ի՝ ԱՄՆ-ի կողմից կիբերհանցագործության մեջ մեղադրվող ՌԴ քաղաքացու նկատմամբ Գաբրիելյանը ժամանակին չի կայացրել կալանավորման որոշում, ինչի պատճառով, ձերբակալման ժամկետը լրանալուց հետո, մեղադրյալն անարգել դուրս է եկել դատարանից և փախել։
Իրավապաշտպանն ուշադրություն է հրավիրում նաև այն հանգամանքին, որ Արտուշ Գաբրիելյանի գործը, փաստացի, քննելու է իր գործընկեր դատավորը, ինչն էլ, հնարավոր է, կաշկանդվածություն ստեղծի արդար քննության համար։
Արդյո՞ք քննարկվել է Արտուշ Գաբրիելյանի՝ ապօրինի ծագում ունեցող գույքի բռնագանձման գործով անցնելը Կոռուպցիայի կանխարգելման հանձնաժողովում։ Factor TV-ին հանձնաժողովից բացասական պատասխան տվեցին։ Ի վերջո, կկարողանա՞ Գաբրիելյանն ապացուցել իր գույքերի օրինականությունը, թե՞, այնուամենայնիվ, նրա ունեցվածքի մի մասը կպետականացվի, ցույց կտա դատավարական ընթացքը։
Մանրամասները՝ տեսանյութում։
Ռոզա Վարդանյան
