Մեզանում ահավոր անճաշակ, ոչ հայի մասին հարմոնիաներով երգերը շատ են, կանգ առնել է պետք. Էմմա Պետրոսյան. ՏԵՍԱՆՅՈՒԹ

«Հայկական երգարվեստում միջակությունը շատացել է և շատանում է, մեզանում հիմնականում ահավոր անճաշակ, ոչ հայի մասին հարմոնիաներով երգերն են շատ, կանգ առնել է պետք, կուզեի` մեկ ժամ առաջ ավարտվեր այս ամենը, բարձիթողի վիճակ է»,- Factor TV-ի հետ զրույցում նշում է երգչուհի, Հայաստանի վաստակավոր արտիստ Էմմա Պետրոսյանը:

Նա անդրադառնում է նաև 2024-ին` որպես մշակութային տարի` արձանագրելով մեր ձեռքբերումներն ու կորուստները, խոսելով աղմկահարույց թեմաներից.

«Ոչ մի կերպ չեմ կարող ընկալել մեր կոնսերվատորիան`մայրաքաղաքի սրտից դուրս, չեմ էլ ուզում պատկերացնել, այն պետք է մնա իր տեղում: Քանի որ 2024-ին եղան տասնյակ թափուր տեղեր նաև կոնսերվատորիայում, նախ` պետք է առանձնացնեմ առաջին խնդիրը` ուսման բարձր վարձը: Պատկերացնո՞ւմ եք`որքան դժվար է լուծել այդ խնդիրն այն ընտանիքների համար, որտեղ մի քանի ուսանող կա: Մյուս խնդիրը 100-200 տեղանոց էքսպերիմենտալ թատրոնի բացակայությունն է մեր երկրում: Եթե մենք ունենայինք այդպիսի մի թատրոն`գերհագեցած ժամանակակից տեխնիկայով, արվեստի բուհերում էլ թափուր տեղեր չէին մնա, դա կլիներ արվեստագետների գործունեության խաչմերուկ»:

Էմմա Պետրոսյանի համար 2024 թվականն, առհասարակ, դադարի և եզրակացություններ անելու տարի էր. «Այս տարի մենք տակնուվրա եղանք, ուզեցինք հասկանալ`ինչ ունեինք, ինչ կորցրեցինք և ինչու, որքան էր մեր իրական ունեցածը: Ինչ վերաբերում է հանրային մթնոլորտին, ուզում եմ հավատալ, որ ստացվում է և կստացվի զերծ մնալ ատելության խոսքից, փնովելով իրար չենք օգնի»:

Մանրամասները`տեսանյութում:

Աննա Բաբաջանյան