07.11.2026 | 20:28
Նարեկ Կարապետյանի հանդիպումը համախմբման կոչին արձագանքած ուժերի հետ. ՈՒՂԻՂ
Բայդենի օգնականի հետ հանդիպմանն Ալիևը դժգոհել է ՀՀ Սահմանադրությունից
Քաղաքականություն
21.10.2024 | 15:08
ԱՄՆ-ն աջակցում է Հայաստանի և Ադրբեջանի միջև խաղաղության պայմանագրի շուտափույթ ստորագրմանը, ներկա պայմաններում խաղաղության պայմանագրի ստորագրման պատմական հնարավորություններ կան։ Այս մասին Ադրբեջանի նախագահ Իլհամ Ալիևի հետ Բաքվում կայացած հանդիպմանն ասել է ԱՄՆ նախագահ Ջո Բայդենի հատուկ օգնական և Ազգային անվտանգության խորհրդում եվրոպական հարցերով ավագ տնօրեն Մայքլ Քարփենթերը։
Ընդգծելով, որ խաղաղության համաձայնագրի ստորագրումը լայն հնարավորություններ կստեղծի տարածաշրջանային համագործակցության համար՝ Քարփենթերը ասել է, որ Միացյալ Նահանգները հաստատուն աջակցություն է ցուցաբերում այս գործընթացն առաջ տանելու համար։
Ալիևն իր հերթին հայտարարել է, թե «Ադրբեջանն է խաղաղության համաձայնագրի և դրա հիմքում ընկած հինգ սկզբունքների նախաձեռնողը»՝ հավելելով, որ Բաքուն «աջակցում է տարածաշրջանային խաղաղության օրակարգին»։ Նա նաև նշել է, թե այն փաստը, որ «Հայաստանը 70 օր հետո է ուղարկել իր վերջնական առաջարկները խաղաղության համաձայնագրի տեքստի վերաբերյալ, որոշակի հարցեր է առաջացնում գործընթացն առաջ տանելու՝ Երևանի մտադրության վերաբերյալ»։
«Նշելով, որ Հայաստանի Սահմանադրությամբ ամրագրված տարածքային պահանջներն Ադրբեջանի նկատմամբ խաղաղության պայմանագրի ստորագրման հիմնական խոչընդոտն են, նախագահ Ալիևն ընդգծել է, որ Ադրբեջանը շարունակելու է վճռական քայլեր ձեռնարկել գործընթացն առաջ մղելու համար»,- ասվում է Ադրբեջանի նախագահականի տարածած հաղորդագրության մեջ։
Հիշեցնենք, որ վերջերս Ալիևը մտահոգություն էր հայտնել, որ ԱՄՆ շուրջ 60 կոնգրեսականներ դիմել են պետքարտուղար Էնթոնի Բլինքենին՝ կոչ անելով ճնշում գործադրել Ադրբեջանի վրա՝ ազատ արձակելու հայ գերիներին ու բոլոր քաղբանտարկյալներին։ Նա ԱՄՆ-ի հասցեին տարբեր մեղադրանքներ էր հնչեցրել, ապա Մոսկվայում ԱՊՀ գագաթնաժողովի շրջանակում ռուսական լրատվամիջոցի հետ զրույցում կրկնել իր դժգոհությունները։
Թարգմանությունը՝ Էմմա Չոբանյանի
