Պատժամիջոցներն ընդհանրապես գոյության իրավունք չունեն․ Ալիևը Մոսկվայում բողոքել է ԱՄՆ-ից

Մոսկվայում ԱՊՀ պետությունների ղեկավարների գագաթնաժողովի շրջանակում Ադրբեջանի նախագահ Իլհամ Ալիևը նախօրեին հարցազրույց է տվել ռուսական «Ռոսիա-1» հեռուստալիքին, որի ընթացքում մեղադրանքներ է հնչեցրել ԱՄՆ-ի հասցեին։ Նա խոսել է Բաքվի նկատմամբ ԱՄՆ պատժամիջոցներից՝ հայտարարելով, որ Ադրբեջանն ընդհանրապես դեմ է բոլոր տեսակի պատժամիջոցներին։

«Դրանք ընդհանրապես գոյության իրավունք չունեն։ Առավել ևս, երբ այդ պատժամիջոցներն անօրինական են և կիրառվում են բոլորովին անհիմն և ընտրողաբար։ Ուստի մենք կտրականապես դեմ ենք ցանկացած պատժամիջոցների, և կարծում եմ, որ միջազգային հանրությունը պետք է իր դիրքորոշումն արտահայտի համախմբված։ Մենք այս դիրքորոշումն ենք հայտնում մեր և ոչ միայն մեր նկատմամբ կիրառվող պատժամիջոցների վերաբերյալ»,- ասել է Ալիևը։

Հիշեցնելով, որ պատժամիջոցները Բաքվի նկատմամբ կիրառվել են 1992 թվականին, Ադրբեջանի նախագահը հավելել է․ «Այդ պատժամիջոցները չեղարկվեցին 2001 թվականին, երբ ԱՄՆ-ին անհրաժեշտ էր օդային, ցամաքային և ծովային բեռները տարանցել Աֆղանստան՝ Ադրբեջանի տարածքով։ Եվ ամեն տարի ԱՄՆ նախագահը, անկախ կուսակցական պատկանելիությունից, իր որոշմամբ չեղարկում էր այդ պատժամիջոցները, մինչև այն պահը, երբ ԱՄՆ-ը փախավ Աֆղանստանից։ Դրանից հետո այս պատժամիջոցները կիրառվեցին մեր նկատմամբ։ Եվ ես նրանց մեղադրեցի երախտամոռության մեջ, կարծում եմ՝ սա ամենադաժան բառը չէ, որ կարելի է օգտագործել այս համատեքստում»։

Հիշեցնենք, որ օրերս Ալիևը մտահոգություն էր հայտնել, որ ԱՄՆ շուրջ 60 կոնգրեսականներ դիմել են պետքարտուղար Էնթոնի Բլինքենին՝ կոչ անելով ճնշում գործադրել Ադրբեջանի վրա՝ ազատ արձակելու հայ գերիներին ու բոլոր քաղբանտարկյալներին։ Նա ԱՄՆ-ին մեղադրել էր «հակաադրբեջանական քայլերի» մեջ։

Թարգմանությունը՝ Էմմա Չոբանյանի